«Кугарня» газет – «Марий Эл» увер агентстве»

🪴 Курыкмарий округ Микрӓк селасе школышто йочасадыш коштшо ӱдыр-рвезе-влаклан агролабораторийым почаш ямдылалтыт. Тидлан 60 квадрат метр кумдыкым ойырымо. Тушто йоча-шамыч тӱрлӧ росотам кушташ, опытым шындаш да кушкыл-влакым эскераш тӱҥалыт. Агролабораторийым «Кадры в АПК» федеральный инициативе почеш илышыш шыҥдарат. Тыгак Кугыжаныш Погынын депутатше Сергей Ильинын вуйлатыме компанийже лабораторийым оборудований дене пойдараш 300 тӱжем теҥгем ойырен.

⚠️ Правилым ида пудырто! Тений январь-августышто Марий Элыште 473 ДТП-м регистрироватлыме, тушто 40 еҥ колен, 634 еҥ эмганен. Ӱмашсе тыгаяк жап дене таҥастарымаште корно туткар 10%-лан шагалемын. Корно туткар-влак коклаште утларакше – машина-влакын ваш тӱкнымышт (198), йолешке-шамычым тӱкымеш (88), кӱветыш кайыман (74), машина кумыкталтман (42). ДТП амал-влак коклаште – чот писын кудалме, правил почеш корным пуымо огыл, ончылно кудалше транспорт дек лишемме, йолешке-шамычын правилым пудыртымышт. Ваштареш полосаш кудал лекме годымат корно туткар-влак чӱчкыдын лиедат. Шуматкечын да шочмын ДТП-м эн шуко регистрироватлат, палдарат Марий Элысе МВД-н Госавтоинспекций управленийыштыже.

Специалистлан – 3 миллион теҥгем 🏥 2024 ийыште Марий Элым Вуйлатыше Юрий Зайцев республикыштына поснак кӱлешан врач-шамычлан илыме условийыштым саемдаш 3 миллион теҥгеаш выплатым ик гана тӱлаш пеҥгыдемден. Тений тудым 7 врачлан пуымо. Выплатын ик эн тӱҥ условийже – 10 ий медучрежденийыште пашам ышташ. Ты проект «Продолжительная и активная жизнь» нацпроектын «Медицинские кадры» проектше почеш илышыш шыҥдаралтеш. Икымше кок ийыште регионысо бюджет гыч 14 врачлан окса полышым пуымо. Тений эмлымверлашке эше 10 специалист-влак пашаш толшаш улыт. Кызыт кундемыштына 209 врачы огеш сите.

📈 Россий Президентын администрацийжым вуйлатышын алмаштышыже Максим Орешкин элыштына пашадар кушмаш аралалт кодеш манын палемден: – Российыште пашадар кушмо тенденций ончыкыжымат аралалт кодеш. Элнан 9 регионыштыжо кокла пашадар 2026 ий июньышто 150 тӱжем теҥгем эртен. Тыгодым июньышто кокла пашадар майыште 110,2 тӱжем теҥге дене таҥастарымаште 114,7 тӱжем теҥге лийын.

🧑‍💻 Таче, 17 сентябрьыште, Марий Элыште сайлымашым тергыше ситуаций рӱдер почылтын. Тудо «Единый Российын» мер полыш штабше негызеш пашам ышташ тӱҥалеш да регионыштына сайлымаш процессым эскерыме системыште кугу надырым пышта. Рӱдерын задачышкыже участке-шамыч гыч информацийым писын погымаш да обрабатыватлымаш, тыгак эскерыше-влакын увертарымыштлан вашештымаш да йӱклымашын чыла этапыштыже процедурын сайын эрташыже йӧным ыштымаш пурат. Структурыш мер эскерыше-шамыч дене пашам ыштыше юрист ден координатор-влак пурат. «Сайлымаш процесс жапыште тӧрсырым ужында гын – 63-00-39 шокшо линийышкына йыҥгыртыза. Ме кажне сигналлан тауштена: лач тендан тӱткылыкда мыланна шоям ышташ тӧчымым чараш да йӱклымашым шот дене шукташ йӧным ышта. Мемнан задачына – сайлымаш чын да объективно эртыже манын, чы…

🎭 Йошкар-Олашке икымше гана С.В.Образцов лӱмеш курчак театр толеш. 18-20 сентябрьыште Республикысе курчак театрыште легендарный Москосо театрын «Кугу гастрольжо» эрта. Ончышо-влакым 6 представлений да 5 спектакль вучат: 🔸 «Необыкновенный концерт» (Гиннессын рекорд книгаже!) 🔸 «Старый сеньор и...» («Золотая Маска» премий) 🔸 «Волшебная лампа Аладдина» 🔸 «Цирк на нитях» 🔸 «Али-Баба и сорок разбойников»