Дэрдэгээн Мэргэн Баатар гэжэ мэдэхэ гүт?
Дэрдэгээн Мэргэн Баатар гэжэ мэдэхэ гүт? Бүхы дэлхэйн ажалшан арад түмэнэй вождь гэжэ алдаршаһан, 1917 ондо Россида социалис хубисхал хэжэ, совет засаг тогтооһон Владимир Ильич Лениниие (Ульяновые) иигэжэ нэрлэдэг байһан ха. «Дэрдэгээ» гэжэ үгэ санскрит «тиртха» гэжэ үгэһөө абтаһан байна. Энэ үгэ «буруу үзэлтэй, бурханай номнолдо оройдоошье этигэдэггүй, бурханай шажаниие һандаргадаг, һүнөөдэг хүн» гэһэн удхатай. Энэ хүнэй дэлхэйдэ үшөө түрөөдүй байхадань, шажанай зурхайшад ном, судар соогоо хаража, үзэл буулгахадаа, наран орохын зүгтэ 1870 ондо Дэрдэгээн Мэргэн Баатар дэлхэйдэ түрэжэ, шажан мүргэлдэ, юрэнхы үзэл сурталда ехэ хохидол болохонь гэжэ элирүүлһэн байна. Дээдэ үеын зоной дунда иимэ үгэ ама дамжан ябадаг һэн – Дэрдэгээн Баатарые дэлхэйдэ түрүүлхэгүйн тула ехэ ехэ дасангуудта шанга уншалганууд болоһон юм гэхэ. Тиибэ яабашье һаань, тэрэ хүн өөрөө бaha тусгаар саанаһаань гэхэ гү, али «дээрэһээн» заабари дүүргэжэ ябаһан хадаа, тон шанга һахюуһатай байжа, ямаршье юумэндэ диилдэнгүй, дэлхэйдэ ерэжэ, өөрынгөө хэхэ, бэелүүлхэ юумэеэ бүримүһэн бүтээһэн болоно. Энэ нэгэ талань. Нүгөөдэ талаһаань харахада, Дэрдэгээн Баатарай ударидалга доро хэн юу хэхэ, юу амасаха, һайниие гү, али мууе үзэхэ - бүхы хубааряараа, энэ хүнтэй нэгэ үе сагта ажаһууха зоной үйлынь үри тулажа ерээд байһан дээрэһээ В.И. Ленинэй бүхы хэрэгынь урагшатай байгаа гэлсэхэ. Гурбадахяар, бурханда һүзэгтэй буряад зон энэ хүниие «Ленин багша» гэжэ нэрлэһэн байдаг. Урданай улад (1870-1920 онуудта түрэһэн зон) Ленин багшын һургаал бүхыдөө зүб, юрын хүнэй аша туһада зохёогдоһон гэжэ дэмжэдэг аад, гансал юумэ – шажанда харша байһыень лэ буруушаадаг һэн. Любовь Намжилон. “Золотые четки”. Буряад үнэн Макс соо уншагты