Тропа́рь всем святы́м
Тропа́рь всем святы́м Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́щии ко Спа́су,/ о нас Того́, я́ко Бла́га, моли́те// спасти́ся, мо́лимся, душа́м на́шим. Тропа́рь за упоко́й Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́:/ никто́же бо безгре́шен,// то́кмо Ты, моги́й и преста́вленным да́ти поко́й. Тропа́рь святи́телю Гу́рию, архиепи́скопу Казанскому Пра́вило ве́ры и о́браз целому́дрия,/ учи́теля до́брых дел/ и наста́вника спасе́ния, даде́ тя Госпо́дь/ новопросвеще́нному гра́ду Каза́ни,/ в не́мже приобре́л еси́ но́выя от язы́к лю́ди,/ и приве́л еси́ я Христо́ви./ Сего́ ра́ди в па́мять твою́ ра́достно соше́дшеся,/ че́стне пра́зднуем свято́е твое́ успе́ние,/ ты же, о́тче наш, святи́телю Христо́в Гу́рие,// моли́ Христа́ Бо́га/ спасти́ся душа́м на́шим.