Анаабыртан икки чаҕылхай ыччаппыт Россия спордун маастара буоллулар 🏅
Анаабыртан икки чаҕылхай ыччаппыт Россия спордун маастара буоллулар 🏅 ✍️ Россия спордун миниистирэ Михаил Дегтярев саҥа бирикээһигэр илии баттаата. Бу үрдүк таһымнаах докумуонунан Анаабыр улууһун икки спортсменнарбыт хотугу многоборьеҕа «Россия спордун маастарын» үрдүк ааты сүктүлэр. Бочуоттоох кэккэҕэ Анаабырдааҕы оҕо спорт оскуолатын (ДЮСШ) иитиллээччилэрэ Анна Бетюнская уонна Вадим Туприн киирдилэр. 🏃🏻♀️ Бу үрдүк ситиһии Аннаҕа кини сыралаах үлэтин уонна сыаллаах-соруктоох дьулуурун толору туоһута буолла. Кини 2026 сыл ыам ыйыгар Алушта куоракка буолан аспыт Хотугу многоборьеҕа Россия Чемпионатыгар бэркэ кыттыбыта. Наартаны ыстаныыга 421 төгүл көтөн, бу көрүҥҥэ үһүс миэстэни ылбыта уонна маастар нуорматын чиэстээхтик толорбута. Кыыһы спорт киэҥ суолугар үктэппит уонна инники кыайыыларыгар тирэх уурбут аан бастакы тренерэ — Константин Афанасьевич Ширяев. 🤸🏻 Вадим Туприн эмиэ туох сыаналааҕын ол таһымнаах күрэххэ төһө кыахтааҕын чаҕылхайдык дакаастаабыта. Кини наартаны 522 төгүл ыстанан дьонун-сэргэтин үөрдүбүтэ. Уолу Анаабыр ДЮСШ-тыгар эрчийбит уонна кыайыыга уһуйбут бастакы наставнига — Саскылана Ивановна Кылтасова. 💠 Билигин кэскиллээх спортсменнарбыт араас таһымнаах чемпионаттарга уонна күрэхтэһиилэргэ ситиһиилээхтик кытталларын салгыыллар, куруук инники күөнҥэ сылдьаллар уонна кыайыы мэтээллэрин аҕалаллар. Кинилэр бэйэлэрин ситиһиилэринэн Анаабыр улууһун спорт сфератын үрдүк кэскиллээҕин чахчы бигэргэтэллэр, хас биирдии хардыыларын биир дойдулаахтара болҕойон кэтии олороллор уонна кинилэринэн киэн тутталлар Россия спордун маастарын аата — бу ситиһии эрэ буолбакка, спортсменнарбытыгар саҥа кынат үүнүүтэ буолар. Аны кинилэргэ өссө үрдүк таһымнаах күрэхтэһиилэргэ кыттар уонна улуу Сахабыт сирин аатыттан аан дойду аренатыгар тахсар киэҥ суол арылынна. 🎊 Анна Бетюнскаяны, Вадим Туприны уонна кинилэр убаастабыллаах тренердарын бу улахан ситиһиинэн ис сүрэхпититтэн эҕэрдэлиибит! MAX каналга биһигини батыс