Сырдыкка айан
Сырдыкка айан ✈❄ Үрүҥ хаарынан бүрүллэн сытар авиабылаһааккаҕа барар суолу көрөммүн оҕо сааһым эмиэ да көрүдьүөс, эмиэ да сыралаах айаммытын санаатым. Элбэх көлүөнэ дьон бу суолунан хааман, сүүрэн билии кыһатыгар орто үөрэҕи ылаары айаннаабыт буолуохтаах. Оччолорго биһигини учаастак оҕолоро дииллэрэ. Кустуур оскуолата 8 кылаастааҕа, ол иһин салгыы Саккырыырга кэлэн интернакка олорон үөрэнэрбит. Сүрүн көлө Ан-2 сөмөлүөт, сибээс быстар мөлтөх этэ. Хата сөмөлүөппүт нэдиэлэҕэ иккитэ көтөрө. Каникулга нэдиэлэ инниттэн үнтү анньыһан син эрдэ кэлэрбит. Дойдубутугар кэлбит дьон сүүрүүнэн кэриэтэ туос сатыы дьиэбитин супту көрбүтүнэн тахсарбыт. Дьэ, төттөрү барыы кытаанах этэ. Сөмөлүөт чуо көппүтүн-көппөтөҕүн ким да билбэт, түһэр сирэ ырааҕын, тымныытын, аны тоҥуу хаары кэһэн сүүрүү, 40 кыраадыс тымныыга аһаҕас халлаан анныгар кэлэр-кэлбэт аалы күүтэн туруу… Дьоммут бөһүөлэк кытыытыгар порт суолугар олорор ыалга күүттэрэллэрэ, дьэ онно иһиллэнэн төттөрү-таары хаамыы, үөһээ-аллараа тыыныы, дьиэлээх дьоҥҥо сыанан аҕаабата буолуо… Оо, күүтүүлээх аалбыт кэллэ, үөһээ-аллара түһэн таҥныы, дьэ уонна буут быстарынан сүүрүү… Дьоммут үлэлэригэр барбыт буоллахтарына дьон көрөр эрэ сиригэр сүүрүү уонна хаалан аныгыскы рейскэ диэри дьиэҕэ көрүлээһин, кыралары дьаһайсыы. Бүгүн эмиэ сөмөлүөппүтүн күүтэбит, бу сырыыга барыбыт дьоно бааллар, ыалбытыгар олорон күүтүү. Сөмөлүөппүт бөһүөлэк үрдүнэн эргийдэ, таҥас-сап сыыһа халты иилинэн сүүрүү. Оо, ийэм эрэйдээх кэннибититтэн, кинилиин Бороскуон эбээ кэккэлэспит «сөмөлүөппүт күүттүн дуу, охтубакка тиийбит киһии, ким эмэ ити аалы күүттэрэ түстэр» диэн санаалаах күөмэй аһыйарынан, тоҥуу хаары оймоон сүүрүү… Эдьиийим Мочуура хаарга умса барда, Ааныка бу сырыыга тилэх уопсан иһэр… Дьоммут барахсаттар ойуур саҕатыгар тураллар, ыһыы-хаһыы мааныта… Һуу кэллибит ээ, үөрбүт аҕай пилоттар күүтэн тураллар, бука биһигини көрөн аһыналлара буолуо. Дьонун өссө син өй булан «подождите, там сестра» игин диибит. Дьоммут дьиэлэрин диэки хааман эрэллэрин сөмөлүөт иһиттэн көрөн аргыый харахпытын соттобут, сыҥсыйабыт да быһыылаах, ол аал тыаһыгар иһиллибэт… Итинник айаннаан Саккырыыры буларбыт. Билигин ол кыра аалбыт көппөт, ким да тоҥуу хаары оймоон сүүрбэт, оҕолор бөһүөлэктэригэр олорон үөрэнэллэр. Көтөр аалбыт былаһаакката ыраахтан күрүөтүн омооно көстөр… ✍ Вера Иванова https://max.ru/channel_bytantayuottara