УПРАВЛЕНИЕ КУЛЬТУРЫ И ДУХОВНОГО РАЗВИТИЯ г. ЯКУТСКА
Без категории · 14 сентября 2026 г.
«Дьокуускайым, ыллыыр-айар…»: Сэмэн уонна Софрон Даниловтар ааттарынан тулаһаҕа үөрүүлэ...
«Дьокуускайым, ыллыыр-айар…»: Сэмэн уонна Софрон Даниловтар ааттарынан тулаһаҕа үөрүүлээх тэрээһин ааста. Балаҕан ыйын 13 күнүгэр Дьокуускай куорат олохтоммута 394 сылыгар анаммыт «Дьокуускайым, ыллыыр-айар…» диэн бырааһынньыктааҕы ураты тэрээһин Сэмэн уонна Софрон Даниловтар ааттарынан сквергэ үрдүк таһымнаахтык ыытылынна. Бырааһынньыктааҕы түһүлгэ Саха норуодунай поэта Сэмэн Данилов «Төрөөбүт мин дойдум» диэн патриоттуу тыыннаах хоһоонунан арылынна. Бу айымньыны Горнай улууһун Бэрдьигэстээх сэлиэнньэтин Сэмэн Петрович Данилов аатынан орто оскуолатын 11-с кылааһын үөрэнээччилэрин «Иэйии» литературнай куруһуогун кыттыылаахтара ураты иэйиилээхтик ааҕан, дьон кутун туттулар (салайааччылар: М. Е. Шамаева, И. И. Сивцева, С. А. Тимофеева).Тэрээһин үөрүүлээх арыллыытыгар истиҥ эҕэрдэ тылларын эттилэр: Каженкин Рустам Николаевич — П. А. Ойуунускай аатынан литературнай түмэл дириэктэрэ, Петров Иван Егорович — СӨ Горнай улууһун Мытаах нэһилиэгин баһылыга, Матаннанова Мотрена Васильевна — Горнай түмсүү чилиэнэ, Мытаах нэһилиэгин землячествотын салайааччыта, улуу суруйааччылар чугас аймахтара, сиэннэрэ уонна кыргыттара — Вера Софроновна уонна Любовь Софроновна Даниловалар. Бу, кэрэ түһүлгэни «Арчы Дьиэтэ» ДКК иһинэн үлэлиир, Валерий Иванов салайааччылаах «Чараҥ» вокальнай ансаамбыла Сэмэн Данилов тылларыгар, Иван Иванов мелодиятыгар «Ферма кыргыттара» диэн сэргэх ырыанан киэргэттилэр. Ону таһынан, Горнай улууһуттан анаан -минээн эҕэрдэлии кэлбит «Сыккыс» литературнай бөлөх кыттыылаахтара хомоҕой хоһооннорун доргуччу ааҕан тэрээһини өссө үрдүк таһымҥа таһаардылар. Тэрээһин устата тулаһа таһынааҕы сиргэ Семен уонна Софрон Петрович Даниловтар бырааттыылар тустарынан «Уран тыл уустара» уулуссаҕа хаартысканан быыстапка ыытыллынна. Хаартыска быыстапка туһунан ыалдьыттарга Горнай улууһун «Мытаах түмэл-галереята» (Саха сирин норуодунай суруйааччылара, бырааттыы Семен уонна Софрон Петрович Даниловтар литературнай түмэллэрэ уонна ССРС, РСФСР, СӨ норуодунай худуоһунньуга Афанасий Николаевич Осипов хартыыналарын галереята) дириэктэр Егоров Артур Николаевич бар дьоҥҥо билиһиннэрдэ. Түмүккэ тэрийээччилэр уонна ыалдьыттар биир суолталаах түгэни санатан аастылар: эһиил ытык дьоммут — саха норуодунай суруйааччылара, ини-бии Сэмэн уонна Софрон Даниловтар төрөөбүттэрэ өрөгөйдөөх үбүлүөйдээх сыллара, онон сиэттэрэн анал араас хабааннаах тэрээһиннэр ыытыллаллара күүтүллэр. Любовь Константинова. #ДеньГорода394