Бэҕэһээ Ытык Күөлгэ «Чолбон» сурунаал күнүгэр бас эрэдээктэр Гаврил Гаврильевич Андросо... — 1 октября 2026 г. в 10:32:59.231
Бэҕэһээ Ытык Күөлгэ «Чолбон» сурунаал күнүгэр бас эрэдээктэр Гаврил Гаврильевич Андросов, солбуйааччы эрэдээктэр Данил Николаевич Макеев уонна биир дойдулаахпыт сурунаал Алампа аатынан бириэмийэтин лауреата, бастыҥ ааптара Федор Иванович Павлов, "Уран тыл" литературнай түмсүү салайааччыта Оксана Андросова кэлэн, Таатта лицейин уораҕай саалатыгар лицеистэр, маҥнайгы, иккис нүөмэрдээх Ытык Күөл орто оскуолаларын үөрэнээччилэрин, барыта 200-тэн тахса оҕону кытары үөрэ-көтө, көх-нэм көрүстүлэр. Гаврил Андросов айымньылара араас омук тылынан тылбаастаммыттара. Оҕолорго саҥа буруобалаабытынан сылдьар хоһооннорун аахта. Прозаик, тылбаасчыт Данил Макеев айар үлэтин билиһиннэрдэ, үөрэх кыһаларын библиотекаларыгар кинигэлэрин бэлэхтээтэ. Федор Павлов "Чолбон" сурунаалга "Абааһы уола", "Кистэлэҥ доҕор", "Чууча", "Босхолонуу", "Оҕо Охонооску уонна сыллааҕы дьаһаах" диэн кэпсээннэрэ биир сыл иһигэр бэчээттэнэн киэҥ сэҥээриини ылбыта, улахан суруйааччылар харахтарын далыгар киирбитэ. Суруйааччылары көрсө кэлбиттэр ортолоругар сурунаал күрэһигэр кыттааччылар бааллара үөртэ. @taattagazeta