Күндү учууталлар, педагогическай үлэ бэтэрээннэрэ уонна үөрэҕирии эйгэтин үлэһиттэрэ!
Күндү учууталлар, педагогическай үлэ бэтэрээннэрэ уонна үөрэҕирии эйгэтин үлэһиттэрэ! Таатта улууһун дьаһалтатын, тус бэйэм ааппыттан Эһигини ис сүрэхпиттэн Учуутал күнүнэн итиитик-истиҥник эҕэрдэлиибин! Учуутал — киһи олоҕор саамай сырдык суолу ыйааччы, билии киэҥ аартыгар сирдээччи, киһи буолан тахсарга сүрүн тирэх буолар үтүө аналлаах киһибит. Биһиги төрөөбүт Тааттабыт сирэ былыр-былыргыттан үөрэххэ-билиигэ тардыһыылаах, саха чулуу интеллигенциятын, духуобунаһын биһигэ буоларынан биллэр. Саха норуотун улуу сырдатааччылара олохтообут үтүө үгэстэрин бүгүн Таатта педагогтара бэриниилээхтик салҕаан, үрдүк таһымнаахтык үлэлии-хамсыы сылдьаллар. Билиҥҥи түргэнник сайдар олоххо учууталтан үрдүк билии эрэ буолбакка, ураты тулуур, саҥаны баһылыырга дьулуур уонна оҕоҕо муҥура суох сылаас сыһыан ирдэнэр. Эһиги сыралаах үлэҕит түмүгэр Таатта үөрэнээччилэрэ өрөспүүбүлүкэ, дойду таһымнаах олимпиадаларга, күрэхтэргэ, билии күөн күрэстэригэр ситиһиилээхтик кытталлар, бастыҥнар кэккэлэригэр киирэллэр. Ордук улахан махталы тиэрдэбин педагогическай үлэ бэтэрээннэригэр! Эһиги үйэлээх үгэстэри, оскуола баай устуоруйатын харыстаан, билиҥҥи эдэр учууталларга үтүө сүбэһит, эрэллээх тирэх буолаҕыт. Ытыктабыллаах учууталларбыт! Эһиэхэ үтүө, айымньылаах сыраҕыт иһин улуус олохтоохторун аатыттан дириҥ махталы биллэрэбин! Хас биирдигитигэр кытаанах чэгиэн туругу, уостубат айар эрчими, санаабыккыт хоту ситиһиилэри баҕарабын! Үөрэнээччилэргит ситиһиилэрэ, төрөппүттэр ис сүрэхтэн тахсар махталлара Эһиэхэ куруук күүс-уох уонна кынат буоллуннар! Дьиэ кэргэҥҥитигэр өрүү ил-эйэ, сылаас эйгэ уонна дьол-соргу тосхойдун! Таатта улууһун баһылыга Айаал Бурцев 📲МАХ|