Быйылгы "Ньурба көмүс күһүнэ" литература күннэригэр үс автор кинигэтэ сүрэхтэннэ.
Быйылгы "Ньурба көмүс күһүнэ" литература күннэригэр үс автор кинигэтэ сүрэхтэннэ. 📚 Антоновкатааҕы "Кыраһа" литературнай түмсүү 35 сылын тэҥэ Лидия Степанова - Дьэргэстэй кыыһа А.Я. Овчинникова аатынан "Түһүлгэ" норуот айымньытын дьиэтигэр "Красная черта" кинигэтэ үгүс сэҥээрээччини түмэ тардан, литература күннэригэр кинигэ сүрэхтэнии эстафетатын саҕалаабыта. 📚 Саргылана Стручкова - Маалыкай Саргылана "Дууһам хаппахчытын арыйабын" кинигэтин уонна ырыанньыгын сүрэхтэниитэ сахалартан бастакы дьахтар-поэт Варвара Потапова түмэл-дьиэтин тэлгэһэтигэр ыытылынна. Саргылана Анатольевна бүгүн төрөөбүт күнэ, онон дьоро түгэн икки бүк долгутуулаах. Эмиэ бүгүн төрөөбүт күннээх улуус баһылыга Алексей Иннокентьев аатыттан, атын икки автор курдук, эҕэрдэ тутта. 📚 Аны Ньурба бастакы суруйааччыта Степан Федотов Дьиикимдэтээҕи Дьөттүн алааһыгар хоһоон, ырыа-тойук доҕордоох Гаврил Монастырев - Уйусхаан "Иэйиим кыымнара" кинигэтэ сүрэхтэннэ. Айылҕа туонатыгар, көмүс күһүн көстүүтүгэр олус истиҥ түгэҥҥэ баян тыаһа аргыстаах элбэх үтүө тыл этилиннэ. 🍁 Онон "Ньурба уоттара" литературнай түмсүү 55 сылыгар үс автор дьоһун бэлэх оҥордулар. Хас биирдиилэрин ураты айар дьоҕурдара инникитин да кинигэҕэ тиһиллэ турарыгар! "Ньурба" хаһыат @gazetanyurba @ulusmedia