Бүгүн Ньурбатааҕы Олоҥхо дьиэтигэр сонун тэрээһин - Ньырбакаанныын киэһээҥҥи аһылык ист...
Бүгүн Ньурбатааҕы Олоҥхо дьиэтигэр сонун тэрээһин - Ньырбакаанныын киэһээҥҥи аһылык истиҥ бэйэлээхтик тэрилиннэ. Социальнай хантыраагын олоххо киллэрбит Ольга Григорьева култуура департаменын кытта холбоһук бырайыага буолар. Ольга ас ураты амтаннаах буолар диэн туойтан анал иһиттэри сакааска оҥотторбут. Чахчы, туой иһиттэн күннээҕи аһыыр аһылыкпыт амтанныын уларыйарга, аһыыр култуура кытары тупсарга дылы буолар курдук. Тэрээһини Лэкээрин ураты быһыылаахтык киэргэттэ. Саламаат, хатырыктан, хатыҥ чаагатыттан үүттээх чэй, араас отону кытта бүлүүдэҕэ ууруллубут 3 чаас буспут эт, сэлиэһинэй бурдуктан оҥоһуллубут лапсалаах миин онтон да атын аһылыктар төрүттэммит устуоруйаларын кэпсээтэ. Күн эргииринэн эргитэн баһан ылан хара бурдуктан оҥоһуллубут лэппиэскэнэн саламааты сиир төрүт култуураны кытары билиһиннэрдэ. Тэрээһин ыҥырыылаах ыалдьыттара Ньурбабытыгар бу курдук сонун сүүрээннэр киирэ туралларыгар махтаннылар. Төрүт үгэспитин сөргүтэр, дойдубут аһын киэҥҥэ тарҕатарга санаммыт Ольга Григорьева дьыалата кэҥии турарыгар баҕа санаа бастыҥа этилиннэ. 🔗 Сиһилии бүгүҥҥү тэрээһин уонна өссө саҥа сонун бырайыактар тустарынан "Ньурба" хаһыат кэлэр нүөмэригэр билсээриҥ. ✍🏻 Лена Петрова