"Биһикчээн" оҕо уһуйааныгар "Көмүс күһүн" тэрээһин үрдүк таһымнаахтык ааста.
"Биһикчээн" оҕо уһуйааныгар "Көмүс күһүн" тэрээһин үрдүк таһымнаахтык ааста. Сылын аайы хас биирдии оскуолаҕа, уһуйааҥҥа күһүн кэлбитин уруйдуур тэрээһиннэр ыытыллаллар. "Биһикчээн" оҕо уһуйааныгар бу тэрээһиҥҥэ сылын ахсын туох эрэ саҥаны киллэрэн иһэллэр. Ол курдук, быйыл оҕолор ырыа ыллаан, хоһоон ааҕан эрэ буолбакка, төрөппүттэрин кытта оҕуруот аһа, фрукта буолан таҥнаннар, авангарднай мода көрдөрдүлэр, көмүс күһүҥҥэ аналлаах тэрээһини киэргэттилэр. Дьэрэкээн өҥнөөх, интэриэһинэй оҥоһуулаах, дьикти тигиилээх араас көстүүмнэр кэлбит ыалдьыттары сөхтөрдүлэр, биһирэннилэр. Салгыы дьаарбаҥка буолла. Манна бурдук астара, оҕуруот аһыттан заготовкалар, араас салааттар, утахтар атыыланнылар. Хас биирдии бөлөх төрөппүттэрэ олус бэлэмнэнэн кэлбиттэрэ көстөр. Бу курдук оҕолор уонна төрөппүттэр кыттыһан, тэҥҥэ кыһаллан, тэрээһиннэргэ кытталлара оҕо көхтөөх, кыһамньылаах, бэйэтигэр эрэллээх киһи буола улаатарыгар төһүү күүс буолара саарбаҕа суох. Уһуйаан үлэһиттэрэ сонун, интэриэһинэй тэрээһиннэри ыыталлара үөрдэр. Василина Татаринова. @oloxsuola @ulusmedia