Чоннуң аргыжар оруктары база көвүрүглер –чугула айтырыгларның бирээзи. — 29 июня 2026 г. в 09:33:47.920
Чоннуң аргыжар оруктары база көвүрүглер –чугула айтырыгларның бирээзи. Эрткен неделяда Кара-Хөл сумузунуң Баштыңы Дажы Уран-оол Данилович, сумунуң аныяктары, Сукпак девискээриниң чурттакчы чону, малчыннары демнии-биле Ак-Кара-Сугда көвүрүгнү септеп кылганнар. Ук көвүрүглер эргижиреп, чоннуң аргыжылгазынга берге байдалды тургузуп турган. Бай-Тайга кожуун чагыргазы тудуг ыяжы садып алыры-биле акшаны аңгылап бээрге, аңаа немей кадаглар база херектиг чугула чүүлдерни Уран-оол Дажы саткаш, чонун эвилелдээш, көвүрүгнү септеп кылганынга чон аажок өөрүп турар. Сукпактың малчыннары боттарының шыдаар шаа-биле чугула ажылга киржип, боттарының үлүг-хуузун кииргеннер. Маркс-оол Хертек өзээр хойну эккеп дөгерген, ак чем, өреме аймаан Артём Иргит, Алексей Салчак база Каадыр-оол Хертек олар эккээрге, ажылдаан чонга амданныг чемни Айдың Сүге кылган. Ажылдың төнчүзүнде Күжүгет Артыштың 53 машиназынга бок артынчыларын чүдүрүп, девискээрни арыглаан. Көвүрүгнү септеп кылган, киришкен кижи бүрүзүнге кожууннуң удуртулгазы өөрүп четтиргенин илередип тур. Шак мындыг демниг, найыралдыг болурувуска бай-тайгажыларның амыдыралынга кандыг-даа моондактар шаптык болбас дээрзинге бүзүреливис улуг. Эр хейлер, кара-хөлчүлер!