Эргим уруглар, ада-иелер, башкылар!
Эргим уруглар, ада-иелер, башкылар! Национал школа хөгжүдер институду губернаторнуң «Уругларга эртем» төлевилелин боттандырары-биле Тыва Республикада школа назыны четпээн өөредилге албан черлеринден өөреникчилер болгаш оларның ада-иелериниң аразынга «Мээң төрээн дылым» деп эртем-шинчилел болгаш чогаадыкчы ажылдар болгаш төлевилелдер мөөрейин эрттирип турар. Сентябрь 8 – Россия чоннарының дылдарының хүнү. Бистиң чуртувус Россия – хөй-хөй чоннарны каттыштырган улуг күрүне. Ында чон бүрүзү бодунуң төрээн дылы, ёзу-чаңчылдары, байырлалдары-биле онзагай болгаш үнелиг. Төрээн дыл чоннуң өнчүзү болур. Бо байырлал чурттуң чон бүрүзүнүң бот-тускайлаң культурлуг өнчүзүн кадагалап сайзырадыры чугула дээрзин сагындырып турар болгаш чоннар аразында чаңгыс демни быжыглаарынче угланган. Россия чоннарының дылдарының хүнүнге тураскааткан викторина 2026 чылдың сентябрь 8-тен 11-ге чедир онлайн-платформага болуп эртерин дыңнадып тур бис. Викторинаны эрттирериниң сорулгалары: - Россия чоннарының дылдары, культуразының байлаан болгаш хөй янзылыын демдеглээри; - чоннуң тыва дыл болгаш өске-даа дылдарның дугайында билиглерин тодарадыры; - төрээн дылынга хумагалыг болурунче чоннуң кичээнгейин угландырары. Викторинага 12 хардан өрү назылыг улус киржип болур. Киржикчи тест хевиринге тургускан айтырыгларны 30 минута дургузунда харыылаар ужурлуг. Викторинаны эрткен түңнелинде киржикчиниң харыылаан баллын көргүзүп турар сертификат көстүп келир, ук сертификатты киржикчи чүгле боду (телефонунче, компьютеринче) кииртип, шыгжап алыр аргалыг болур. Киржикчи эгезинде бүрүткелге долу адын, хар-назынын болгаш чурттап, өөренип азы ажылдап турар черин шын бижип алыры чугула. Бүрүткелге айыткан медээлер киржикчиниң сертификадынга көстүп келир. Викторина сентябрьның 8-те 09.00 шактан эгелээш, сентябрь 11-ниң 21.00 шакка чедир болур. Ооң соонда ссылка хагдына бээр. Ссылказы: onlinetestpad.com/adupinjt4stvy