Республикага Тыва дыл хүнүн 2016 чылда демдеглеп эрттирип эгелээнден бээр Ноябрь 1 – ты...
Республикага Тыва дыл хүнүн 2016 чылда демдеглеп эрттирип эгелээнден бээр Ноябрь 1 – тыва чоннуң база бир онзагай байырлалы болу берген. Тыва дыл – бистиң төрээн чонувустуң өске чоннардан онзаланып чоруур эң-не дээди эртинези, байлакшылы. Кандыг-даа омак-сөөктүг кижиниң дээди чоргааралы – ооң төрээн дылы болур. Кижи төрелгетенниң ниитилелинде аңгы-аңгы аймак-сөөктүг чон бүрүзү төрээн дылын, төөгүзүн, үндезин культуразын, ада-өгбелериниң чаагай чаңчылдарын болгаш ыдыктыг сүзүглелдерин салгалдан салгалче дамчыдып, ол-ла бүгүнү кезээ мөңгеде кадагалап арттырып алырын күзеп чоруур. Бай-Тайга кожуунда тыва дыл хүнүн уткуштур уруглар албан-черлеринде база албан-организацияларда янзы-бүрү хемчеглер болуп турар. Кожууннуң чагырга ажылдакчылары диктант бижип, боттарының төрээн дылының бижимел чугаазын кайы хире билирин хынап, беңик сонуургал-биле диктантыны бижээннер. Түңнелинде: 1-ги черде Шолбан Кудурукпай, айыыл чок чорук болгаш кем-херек болдурбас талазы-биле чагырга даргазының оралакчызы; 2-ги черде Саяня Дүгер, Көдээ ажыл-агый эргелелиниң зоотехник-консультантызы; 3-кү чер- Анжела Хомушку, санакчы палатаның инспектору. База катап төрээн дылывыстың байырлалы – Тыва дыл хүнү-биле! Бистиң төрээн дылывыстың үнези үргүлчү бедик болур болзун! Арыг бурун, чечен-мерген тыва дылывыс мөңге шагда читпес болзун деп йөрээдивис!