Бэс ыйын 22 күнэ — Кэриэстэбил уонна Кутурҕан күнэ.
Бэс ыйын 22 күнэ — Кэриэстэбил уонна Кутурҕан күнэ. Бу күн бэс ыйын 22 күнүгэр 1941 сыллаахха фашистскай Германия Сэбиэскэй Сойууска соһуччу саба түһэн, Аҕа дойду уоттаах сэриитэ саҕаламмыта. Кыһыл Армия кэккэтигэр Ийэ дойдуларын көмүскүү Саха Автономнай өрөспүүбүлүкэтиттэн барыта 62509 киһи ыҥырыллыбыта. Кинилэртэн 26129 киһи дойдуларыгар эргиллибэтэхтэрэ... Оттон Чурапчыттан сэриигэ 2170 киһи ыҥырыллыбыта. Мантан барбыт 36 саллаат Берлини ылыыга кыттыбыта, 72 офицер саллааттары кимэн киириигэ киллэрбиттэрэ. Фашистары утары сэриигэ эр санааны уонна хорсун быһыыны көрдөрбүт 130 биир дойдулаахтарбыт бойобуой уордьаннарынан, 165 мэтээлинэн наҕараадаламмыттара. Хомойуох иһин, 975 Чурапчы дьоно сэрии уоттаах толоонуттан дойдуларыгар эргиллибэтэхтэрэ. Сэрии сылларыгар Чурапчы колхуостарын күүс өттүнэн Хоту көһөрүү ыытыллыыта - “Чурапчы иэдээнинэн” ааттаммыт биһиги улууспут устуоруйатын харах уулаах хомолтолоох страницата. Биир дойдулаахтарбыт кэлэр көлүөнэ, бүтүн дойду уонна аан дойду эйэлээх олоҕун туһугар оҥорбут хорсун быһыыларын, Кыайыы туһугар эр санааларын, төрөөбүт дойдуга бэриниилээх тапталларын биһиги өрүү өйдүөхпүт. Фроҥҥа Кыайыыны аҕалар туһугар тыылга сэрии сэбин уһаммыт дьоммутун үйэлэргэ умнубаппыт. Кинилэр хорсун быһыыларыгар сүгүрүйэбит, үрдүк ситиһиилэригэр тэҥнэһэргэ дьулуһабыт уонна олохтообут үтүө үгэстэрин эрэллээхтик салгыыбыт. Киэн туттабыт, өйдүүбүт уонна кэриэстиибит! Күн бүгүн нацизм уонна фашизм хаттаан күөрэйиитин хам баттыыр туһугар бара турар анал байыаннай дьайыыга аҕа көлүөнэ холобуругар тирэнэн биһиги дойдубут хайаан да кыайыылаах буолуоҕар эрэлбит улахан! Ким да умнуллубат, туох да умнуллубат!