Дойду Президенин 2026 сыллааҕы иккис конкурсугар Чурапчыттан үс бырайыак кыайда. — 18 июня 2026 г. в 06:31:10.181
Дойду Президенин 2026 сыллааҕы иккис конкурсугар Чурапчыттан үс бырайыак кыайда. Ол курдук, бастакынан, "Төлөй нэһилиэгин "Айар киинин" "Туойдьут төлөйдөр - от мастерства к мастерству - возрождение якутской керамики как путь к творческой самореализации женщин Чурапчинского улуса" бырайыага 994 756,64 солк. өйөбүлү ылары ситистэ. 2022 сылтан Саха Өрөспүүбүлүкэтин туойдьуттарын Союһун чилиэнэ, Төлөй-Дириҥ нэһилиэгин маастарын Наталья Гуляева салайыытынан мастарыскыай үлэлээн саҕалаабыта. Бу бырайыак сыала - Чурапчы улууһун кэрэ аҥаардарын түмүү, туойтан төрүт оҥоһук сатабылларыгар үөрэтии. Бырайыак айар дьоҕуру сайыннарыыга, алтыһыыга, сэһэргэһиигэ, бэйэ ис кыаҕын үрдэтиигэ туһуланар. Иккиһинэн, Чурапчы улууһун коммерческайа суох тэрилтэлэрин өйүүр ресурснай киинин "Территория успешного развития: новый статус НКО" бырайыагынан 956 792,78 солк. өйөбүлү ылар кыахтанна. Бу бырайыак улууска гражданскай уопсастыба института бөҕөргүүрүгэр уонна тыа сирэ социальнай туруктаах буолуутун үрдэтиигэ туһуланар. Бырайыак түмүгэр коммерческайа суох тэрилтэлэр туруктаах буолуулара, салайааччылар салайар сатабыллара сайдарыгар олук буолуо. Бырайыак саҥа таһымҥа тахсар кыаҕы биэрэн, нэһилиэнньэҕэ социальнай өҥөнү оҥорор буолуохтара. Үсүһүнэн, Соловьев нэһилиэгин "Уйгу" общественнай тэрилтэ "Детский центр лабораторных исследований "ГРАНИ" бырайыага 992 753,35 солк. өйөбүлү ылар буолла. Бу бырайыак көмөтүнэн оскуола үөрэнээччилэрэ араас таһымнаах научнай практическай конференцияларга ситиһиилээхтик кыттар таһымнара үрдүөҕэ. Бырайыак чэрчитинэн эбии үөрэтэр сыаллаах аныгы лабораторнай тэриллэр ылыллан, оҕолорго чинчийэр сатабылларын таһыма үрдүүрүгэр төһүү күүс буолуохтара.