Чурапчы улууһун дьаһалтатын планеркатыгар ааспыт нэдиэлэҕэ ыытыллыбыт үлэлэр, тэрээһинн... — 23 июня 2026 г. в 06:43:05.631
Чурапчы улууһун дьаһалтатын планеркатыгар ааспыт нэдиэлэҕэ ыытыллыбыт үлэлэр, тэрээһиннэр түмүктэрин таһааран, үүммүт нэдиэлэ былаанын ылыннылар. Планерка саҕаланыытыгар байыаннай дьайыыга Ийэ дойду көмүскэлигэр олохторун толук уурбут биир дойдулаах буойуттар дьонноругар наҕараадалары туттардылар. “Эр санааланыы” уордьана Альберт Герасимовка, Николай Иннокентьевка, Степан Капрыновка, Николай Макаровка, Руслан Павлуцкайга уонна Владимир Сибиряковка ананнылар. Айтал Оконешниковка анаммыт “Эр санааланыы” уордьанын уонна Суворов мэтээлин, Афанасий Сивцевкэ анаммыт “Хорсунун иһин" 2-с истиэпэннээх мэтээли кинилэр дьонноругар туттардылар. Ааспыт нэдиэлэҕэ улуус спортсменнарын хамаандата «Дьулуур» спорт адаптивнай көрүҥнэригэр өрөспүүбүлүкэ XV спартакиадатыгар кыттан кэккэ бириистээх миэстэлэри ылары ситистилэр. Онон II бөлөххө Чурапчы улууһун хамаандата 2 бочуоттаах миэстэҕэ таҕыста. Планеркаҕа Саха сирин бастакы Социалистическэй үлэ Дьоруойа, Ленин аатынан уордьан кавалера, “Сиэрпэ уонна балта” Кыһыл Сулус хаһаайына, биир дойдулаахпыт, аатырбыт сылгыһыт Роман Иннокентьевич Константинов-Дьоруой Арамаан сырдык аатыгар анаммыт улууспут ыһыаҕа үрдүк тэрээһиннээхтик бэркэ ыытыллыбытын бэлиэтээтилэр. Салгыы планеркаҕа иһитиннэриинэн, Чурапчы улуус ыһыаҕын иитинэн Дьоруой төрөөбүтэ 130 сылыгар аналлаах ат сүүрдүүтэ ипподромҥа Бөтүгүттэ алааһыгар Одьулуун нэһилиэгэр көхтөөхтүк, тэрээһиннээхтик ыытыллыбыт. Ыһыахха “Тоҕус томтор оонньуулара” күрэхтэһиигэ өбүгэ оонньууларын көрүҥэр успуорт маастара, ХХ үйэ бастыҥ ыспарсымыана Степан Алексеев сырдык кэриэһигэр ХI-с үбүлүөйүнэй күрэх хаһааҥҥытааҕар даҕаны өрө күүрүүлээхтик ыытыллыбыт. Манна саха эр бэртэрэ, боотур бухатыырдара илин былдьаһан, кыайыылаахтар быһаарыллыбыттар. Планерка кэмигэр Чурапчы гимназиятын үөрэнээччитэ Виктория Захарова саха тылын биир кэлим эксээмэнигэр 100 баалы, С.К. Макаров аатынан Чурапчытааҕы гимназия выпускнига Сивцева Айсана Куо нуучча тылыгар ЕГЭ түмүгүнэн 100 баалы ылбыттарын туһунан иһитиннэрдилэр. Чурапчы улууһуттан 2026 сылга Бүтүн Арассыыйатааҕы "Сыл дьиэ кэргэнэ" куонкурус өрөспүүбүлүкэтээҕи түһүмэҕэр уон дьиэ кэргэн кыттан, олортон икки дьиэ кэргэн - "Тыа сирин дьиэ кэргэнэ" номинацияҕа Бахсыттан Анастасия уонна Иван Шеломовтар уонна "Эдэр ыал" номинацияҕа Сандаара, Айсен Решетниковтар дьиэ кэргэннэрэ дойду таһымнаах күрэххэ кытталларыгар докумуоннара хомуллан, Бүтүн Арассыыйатааҕы куонкурус хамыыһыйатыгар ыытыллыбыт. Ааспыт нэдиэлэҕэ улуус үрдүнэн бу курдук кэккэ араас тэрээһиннэр ыытыллыбыттар. Улуус дьаһалтатын планеркатыгар үүммүт нэдиэлэҕэ хаачыстыбалаах олорор дьиэнэн хааччыйыы боппуруоһугар хамыыһыйа мунньаҕа, Медколледж выпускниктарыгар дипломнары туттарыы, Туймаада ыһыаҕар бэлэмнэнии, кыттыы курдук тэрээһиннэр, онтон да атын дьаһаллар саҥа нэдиэлэ былааныгар киирдилэр.