Улуус баһылыга Степан Саргыдаев Билии күнүнэн уонна саҥа үөрэх сыла саҕаланыытынан И.М.... — 1 сентября 2026 г. в 08:18:55.699
Улуус баһылыга Степан Саргыдаев Билии күнүнэн уонна саҥа үөрэх сыла саҕаланыытынан И.М. Павлов аатынан оскуолаҕа сылдьан, үөрэнээччилэри, учууталлары уонна төрөппүттэри эҕэрдэлээтэ. Степан Анатольевич эҕэрдэтигэр оскуолаҕа ылыллыбыт билии инники олоҕу, кэрэ кэскили түстүүрүн бэлиэтээтэ. Үөрүүлээх линейкаҕа оҕолору, учууталлары, төрөппүттэри Чурапчы нэһилиэгин баһылыга Владимир Сивцев, оскуола дириэктэрэ Николай Попов, үөрэх управлениетыттан уопсай үөрэхтээһин отделын начаалынньыга Ираида Винокурова, "Кыталык" оҕо сайдар киинин аатыттан Мурун Тыымпыйа түөлбэтин салайааччыта Елена Семенова эҕэрдэлээннэр, чуолаан, маҥнайгы кылааска киирэр кырачааннарга уонна олох улахан суолугар үктэнээри бэлэмнэнэр үөрэнээччилэргэ саамай долгутуулаах ураты күнүнэн эҕэрдэ истиҥ тылларын анаатылар. Ол курдук, кинилэр оҕолорго билиигэ-көрүүгэ тардыһыылаах буолалларыгар, сыллааҕы үөрэхтэрин ситиһиилээхтик түмүктүүллэригэр баҕардылар. Оттон учууталларга улахан эппиэтинэстээх үлэлэригэр айымньылаах сыһыаны уонна уостубат күүһү-уоҕу баҕардылар. Төрөппүттэргэ туһаайан, оҕолорун ситиһиилэриттэн үөрүү-көтүү эрэ аргыстаах буолалларыгар, кинилэргэ өрүү эрэллээх тирэх, өйдөөччү, өйөөччү буолалларыгар баҕа санаа бастыҥын анаатылар. Оскуоланы эһиил бүтэриэхтээх оҕолор саҥа бастакы кылааска киирбит үөрэнээччилэргэ бастыҥ баҕаларын тиэрдэн туран кэлэр кэм көтөр аалын, самолеттары туттардылар. Бу күн дойду уонна өрөспүүбүлүкэ былаахтарын күөрэччи көтөҕөн, гимнары ньиргитэн, Билии күнэ арылынна. Үөрэнээччилэри чугдаарар чуораан эҕэрдэлээн чугдаарда. Саҥа үөрэх сыла хас биирдии ыалга, хас биирдии оскуолаҕа үрдүк ситиһиилэри уонна айымньылаах үлэни, үөрэҕи аҕаларыгар алгыс тыллар этилиннилэр.