📢 Эрзин кожууннуң В. Л. Эренчин аттыг төп ном саңынга А. И. Дирчинниң үндүргени "Эртке... — 3 сентября 2026 г. в 09:01:47.388
📢 Эрзин кожууннуң В. Л. Эренчин аттыг төп ном саңынга А. И. Дирчинниң үндүргени "Эрткен оруу Тываның төөгүзү биле тудуш" деп номунуң бирги таныштырылгазы болуп эрткен... 📚 Тыва Республиканың алдарлыг башкызы, Күш-ажылдың хоочуну, Иениң медалиниң 2-ги чергезиниң эдилекчизи, Эрзин кожууннуң Хүндүлүг чурттакчызы Александра Идамовна дөрттен ажыг чылдар дургузунда Кожууннуң өөредилге шугумунга бердинип, үре-түңнелдиг, шаңнал-макталдыг орус дыл, төөгү башкылап ажылдап чораан Башкывыс болур. Александра Идамовна башкы боорундан аңгыда төрээн чуртту, чери, чону дээш сагыш аарып чоруур кижилерниң бирээзи болур. Бо номну бижип, чырыкче үндүргени Александра Идамовнаның бодалы-биле, чырык черге чаяаттынып, өзүп- доругуп, амыдырап, узун назылап чурттап келгеш, аныяк өскенге, чонунга өртээ чок өнчү кылдыр номну бижип артырып каары болурун чугаалады. ✍️Номда өөнүң ээзи Сайзов Дандынович-биле Александра Идамовнаның намдарын улуг чурттувус Россияның, Тыва Арат Республиканың үезинден бээр база кожуунувуска болган төөгүлүг болуушкуннар-биле холбап бижээни улуг сонуургалды оттурган. 🌷Ном байырлалынга келген аалчылар: Эрзин кожууннуң Чагырга даргазының Аппарат эргелелиниң башкарыкчызы Ч. Ш. Чурук, Кожууннуң өөредилге эргелелиниң даргазы Н. Б. Уржук, Эрзин кожууннуң хөй-ниитичи хоочуннары, Эрзин ортумак школазының башкылары дээш сонуургааннар хөй болган. Келген аалчылар сөс ап, Александра Идамовнага байыр чедирип, бо номга үнелелин берип, төөгүге артар ужурлуг ном деп чүүлдү демдеглеп чугаалап турганнар. Кожууннуң өөредилге эргелелиниң даргазы Н. Б. Уржук Александра Идамовнаны аныяк башкыларга улуг дуза болур номну бижип үндүрерин саналдап, дилээни база чөптүг болган. 👏Хемчегниң сөөлүнде Башкы бодунуң номун Эрзин кожууннуң ном-саңнарынга база келген аалчыларга белекке бергени дыка улуг өөрүшкү болган. ❗"Эрткен оруу Тываның төөгүзү- биле тудуш" номну сонуургап турар чонувусту Эрзин кожууннуң В. Л. Эренчин аттыг төп ном саңының чурт-шинчилел килдизинге кээп, номчуп таныжарыңарны дыңнаттывыс!