Убаастабыллаах тыа хаһаайыстыбатын уонна астыыр-үөллүүр салаа үлэһиттэрин, бэтэрээннэрб...
Убаастабыллаах тыа хаһаайыстыбатын уонна астыыр-үөллүүр салаа үлэһиттэрин, бэтэрээннэрбитин уонна бары тыа сирин туруу үлэһит дьонун идэлээх бырааһынньыккытынан итиитик-истиҥник эҕэрдэлиибин! Нам улууһун тыатын хаһаайыстыбата сайдарын туһугар эһиги биир күн тохтообокко, күүстээх соруктары туруорунан үлэлиигит-хамсыыгыт. Эһиэхэ тыа хаһаайыстыбатын астыыр-батарар тиһигин кэҥэтиигэ уонна бөҕөргөтүүгэ, аһы-үөлү оҥорон таһаарыыны улаатыннарыыга сыралаах үлэҕит, үрдүк ситиһиилэргит иһин улуус салалтатын уонна тус бэйэм ааппыттан барҕа махталбын биллэрэбин! Кэлин сылларга улууспутугар тыа хаһаайыстыбатынан дьарыктанааччылар ортолоругар улахан сэргэхсийии, сонун саҕалааһыннар таҕыстылар. Ол курдук, сүөһүнү элбэтэргэ интэриэс үөскээтэ – саҥа саҕалыыр фермердэргэ, дьиэ кэргэн фермаларыгар бэриллэр Гран куонкурустарыгар кыттар хаһаайыстыба ахсаана элбээтэ. Тыа хаһаайыстыбатын министиэристибэтин көмөтүнэн сүөһү иитэр комплекстар, сылгы баазалара, астыыр-таҥастыыр салаа эбийиэктэрэ үлэҕэ киллэриллэллэр, анал техника ылыныллар, үлэ технологията тупсарыллар, үүтү астыыр тэриллэр саҥардыллаллар. Улууска Модут орто оскуолатын баазатыгар бастакы агрокылаас аһыллыыта бэлиэ түгэнинэн буолла. Быйыл Нам улууһун тыа хаһаайыстыбатын үлэһиттэрэ үчүгэй түмүктэри ситистилэр. Төһө да уустук күн-дьыл турбутун иһин, 28 367,60 тонна от бэлэмнэнэн кыстыгы этэҥҥэ туоруур кыахтанныбыт. Сенааһы, сиилэһи бэлэмнээһин былаана аһара толорулунна. Бурдук уопсай хомуйуута былырыыҥҥы таһымы куоһарда уонна 2 % үрдээтэ, оттон үүнүү 10 ц/гаҕа тиийдэ. Ону тэҥэ хортуоппуйу уонна оҕуруот аһын хомуйуу валовай көрдөрүүтэ 112 %-ҥа тэҥнэстэ. Үүтү бэлэмнээһин кээмэйэ 129%-ҥа таҕыста. Убаастабыллаах тыа хаһаайыстыбатын үлэһит дьоно-сэргэтэ! Баҕарабын эһиэхэ эйэлээх халлааны, быйаҥнаах ходуһаны, үрдүк үүнүүнү уонна дьоһун дохуоту! Чэгиэн-чэбдик доруобуйаны, тус бэйэҕитигэр уонна дьиэ кэргэттэргитигэр этэҥҥэ буолууну, ситиһиини, дьолу-соргуну! Ытыктабылы кытта, «Нам улууһа» муниципальнай оройуон баһылыга Юрий Иннокентьевич Слепцов