Нам улууһугар оҕону кыра сааһыттан төрүт саха оонньууларыгар уһуйууга болҕомто ууруллар.
Нам улууһугар оҕону кыра сааһыттан төрүт саха оонньууларыгар уһуйууга болҕомто ууруллар. Алтынньы 15 күнүгэр Хатырык нэһилиэгин «Кэрэчээнэ» оҕо сайдар киинигэр сахалыы ыстаныыга спорт маастара, 2025 сыллаах Манчаары оонньууларын призера, Нь.С. Тимофеев аатынан Намнааҕы республика олимпийскай солбугу бэлэмниир спорт оскуолатын чэпчэки атлетикаҕа тренерэ Владислав Попов маастар-кылаас ыытта. "Спорт нөҥүө үгэстэри харыстыыбыт» тэрээһин оҕо уһуйаанын төрөппүттэрин көҕүлээһининэн гран куонкуруһугар кыайбыт «Өбүгэлэр оонньуулара» бырайыак чэрчитинэн барда. Бу иннинэ оҕо сайдар киинэ сахалыы остуол оонньууларыгар күрэх тэрийбитэ, онтон алтынньы 23 күнүгэр "Өбүгэлэр оонньуулара" фестиваль ыытар былааннаах. Бу “Алаас оонньуулара”, Дыгын оонньууларын мини-версията, Дыгын оонньууларын кыайыылааҕа Алексей Кутуков бирииһигэр улуус уһуйааннарын икки ардыларыгар комплекснай спартакиада суотугар барар. Бу күн улуус хоту сытар оҕо саадтарын кустовой методическай холбоһуктарын физическэй култуураҕа инструктордара, төрөппүттэр уонна уһуйаан иитиллээччилэрэ ыстаныыга Саха Республикатын спордун маастара Владислав Поповтан сахалыы спорт көрүҥнэригэр - "Кус быһыйга", куобахтааһыҥҥа, ох саанан ытыыга, кумахтаах сүүрүүгэ, ойбонтон уулааһыҥҥа, мас тардыһыытыгар - үгүскэ үөрэннилэр, сүбэ-ама ыллылар. “Нам улууһа” МО пресс-сулууспата