Ыаллыы Өлөөн улууһугар көмө оҥоһуллар — 4 августа 2026 г. в 02:24:52.326
Ыаллыы Өлөөн улууһугар көмө оҥоһуллар Өлөөн эбэҥки национальнай улууһугар улахан баһаардар туран улахан кыһалҕаны үөскэппиттэрин билэбит. Улуус саамай уһук, кытыы сытар Ээйик нэһилиэгэ улуус кииниттэн бэрт ыраах, ол оннугар улууспут кыраныыссатыттан чугас. Өлөөн улууһун атын даҕаны нэһилиэктэрэ эмиэ улахан кыһалҕаҕа түбэстилэр. Ыарахан кэмҥэ хардарыта көмөлөсүһүү – норуот үтүө үгэһэ, олох мүччүрүйбэт сокуона. Ньурба улууһун дьоно-сэргэтэ, ол иһигэр урбаанньыттар, тэрилтэлэр үлэһиттэрэ, уопсастыбанньыктар уо.д.а. маны өйдөөн, ыаллыы улууспут олохтоохторугар көхтөөхтүк көмөлөһөллөр. Туһааннаах сулууспалар үлэһиттэрэ баран үлэлээбиттэрин таһынан, уматыгынан, аһынан-үөлүнэн эмиэ оҥоһуллар. Бэҕэһээ номнуо үһүс төгүлүн гуманитарнай көмөнү тиэммит бөртөлүөт Ээйиккэ көтөн тиийдэ. Ол иһигэр ЕДДС-ка урбаанньыттар Соломонова Екатерина Васильевна, Андреев А.С. уо.д.а. аҕалан туттарбыт астарын, малларын илтилэр. Итини таһынан «КөмүсКэл» волонтерскай сыах дьону көҕүлээн үп хомуйан атыыласпыт 6 дьааһык астара уо.д.а. эмиэ тиксэрилиннэ. Өлөөннөр 6 буочука А-92 бэнсиини, 1 буочука тиэхиньикэ арыытын сакаастаан атыыласпыттарын илтилэр. Итиэннэ Дьокуускайга Гражданскай оборуона министиэристибэтэ атыыласпыт элбэх наадалаах малын: 400 устуука ИРП, 2 бензопиланы, 2 мотопомпаны, 30 уст. уу фильтрин, 50-нуу уст. защитнай ачыкыны уонна маасканы эмиэ тиэртилэр. Бары көмөлөспүт дьоммутугар уонна туһааннаах тэрилтэлэргэ улуус салалтатын аатыттан истиҥ махталбытын тиэрдэбит! Улуус дьаһалтатын пресс-сулууспата. https://t.me/MP_NRB/34450?single