Арассыыйа Киинэтин күнүнэн! — 27 августа 2026 г. в 07:34:04.597
Арассыыйа Киинэтин күнүнэн! Ытыктабыллаах «Юнион» кинотеатр үлэһиттэрэ, киинэ бэтэрээннэрэ уонна киинэни таптааччылар! «Ньурба оройуона» муниципальнай оройуон дьаһалтатын уонна оройуон дьокутааттарын Сүбэтин аатыттан эһигини бүгүн дойду үрдүнэн бэлиэтэнэр Арассыыйа киинэтин күнүнэн итиитик-истиҥник эҕэрдэлиибит! Историяттан биллэринэн, биһиги улууска 1914 с. сайын П.Никулин бэйэтин кинематограбын кытта Ньурбаҕа кэлэ сылдьан аан маҥнай киинэ көрдөрбүт, кэлин 1929 с. Ньурбаҕа саҥата суох киинэ көрдөрүүтэ саҕаламмыт. 1974 с. ыам ыйын 22 к. «Ньурба» кинотеатр аһыллыаҕыттан, элбэх күннэр-дьыллар устан аастылар. Бу күн биир дойдулаахтарбытын, киинэ бэтэрээннэрэ И.С.Жараевы, Н.О.Баттаховы, А.М.Неустроевы, М.В.Игнатьеваны, Г.П.Адияновы, В.Е.Гороховы, Н.Н.Саввиновы, В.В.Тихонованы, М.М.Филиппованы уо.д.а атыттары үтүө тылларынан махтана ааттыыбыт. Билигин аҕа көлүөнэ килбиэннээх эстафетатын эдэр үлэһиттэр чиэстээхтик салгыыллар. Итини таһынан оскуола үөрэнээччилэрэ, кэккэ нэһилиэктэр киинэ устуутугар сыстан үлэлэһэр буолбуттара кэрэхсэбиллээх. Күүскэ сайдан иһэр саха киинэтигэр үгүс оруолларга ситиһиилээхтик уһуллан элбэх көрөөччүлэр биһирэбиллэрин ылбыт Ньурбатааҕы тыйаатыр артыыстарынан уонна Дьокуускайга ситиһиилээхтик үлэлии биир дойдулаахтарбытынан киэн туттабыт. Эһиэхэ үлэҕитигэр-олоххутугар ситиһиилэри, чэгиэн-чэбдик доруобуйаны, дьолу-соргуну уонна этэҥҥэ буолууну баҕарабыт! «Ньурба оройуона» МО баһылыга А.М.ИННОКЕНТЬЕВ. «Ньурба оройуона» МО дьокутааттарын Сүбэтин бэрэссэдээтэлэ Н.М.МИХАЙЛОВА.