Аттестат ылбатах оҕолору кытта барыахтаах үлэни дьүүллэстилэр — 27 августа 2026 г. в 04:47:39.559
Аттестат ылбатах оҕолору кытта барыахтаах үлэни дьүүллэстилэр Атырдьах ыйын 26 к. улуус баһылыгын социальнай боппуруостарга солбуйааччыта Наталия Петрова Үөрэх хаачыстыбатын сэбиэтин сүбэ мунньаҕын салайан ыытта. Улуустааҕы үөрэх салалтатын салайааччытын солбуйааччыта Сергей Васильев сүрүн дакылаатыгар ааспыт үөрэх дьылын түмүктэрин ырытта. ГИА сүрүн түһүмэҕин кэнниттэн 11 кылаас оҕолоруттан – 19, 9 кылаастартан – 37 оҕо эксээмэннэрин кыайан туттарбакка, аттестаттарын ылбатылар. Балаҕан ыйын 3 к. «күһүҥҥүлэммит» оҕолор эксээмэннэрин хаттаан туттарыахтара. Аттестат ылбатах оҕолордоох оскуолалар салайааччылара оҕолору кытта хайдах үлэлии сылдьалларын иһитиннэрэн отчуоттаатылар. Сүрүн кыһалҕанан учууталлар, чуолаан математика, нуучча тылын уонна литературатын учууталлара тиийбэттэрэ, оҕолору уонна төрөппүттэри кытта үлэ ситэтэ суоҕа ааттанна. Аттестаты кыайан ылбатах оҕолор орто анал үөрэххэ киирэн идэлээх буолалларын ситиһэргэ сорук турар. Математикаҕа учууталлар идэлэрин үрдэтиигэ Дьокуускайтан исписэлиистэри ыҥыран аҕалан хастыы да күннээх куурустары ыытарга, методическай холбоһуктар үлэлэрин күүһүрдэн атын даҕаны биридимиэттэргэ учууталлар идэлэрин таһымнарын үрдэтиигэ утумнаах үлэни тэрийэллэригэр, оскуолалар уонна кылаас салайааччылара оҕолор олорор усулуобуйаларын хонтуруолга туталларыгар сыһыаннаах этиилэр киирдилэр уонна чопчу сорудахтар тиэрдилиннилэр. Итини таһынан Наталия Семеновна оскуолалар үөрэххэ киирбит оҕолору мониторинныы олоруохтаахтарын, үөрэхтэн тохтуур түгэннэригэр кинилэр эмиэ идэлээх, дьарыктаах буолалларыгар үлэ барыахтааҕын бэлиэтээтэ. Иитии үлэтигэр биир сүрүн хайысханан СВО хорсун буойуттарын үйэтитии буолар. Кинилэргэ аналлаах истиэндэлэр, Дьоруойдар паарталара уо.д.а. ис хоһоонноругар толору эппиэттиир уонна ситэри-хотору буолуохтаахтар, биир даҕаны СВО кыттыылааҕын аата көтүтүллүө суохтаах. Дьоруойдар паарталара оскуолаларга барытыгар баар буолуора ирдэнэр, элбэх киһиэхэ анаммыт уопсай паарта эмиэ баар буолуон сөп. Дьоруойдар паарталара хайдах туһаныллыахтааҕа РФ Үөрэҕирии министиэристибэтин анал бирикээһинэн сүрүннэнэр. Көннөрү экспонат курдук турбакка, маннык паарталарга оскуола кэлэктиибин быһаарыытынан ыйынан, чиэппэринэн, сыл аҥарынан эбэтэр сылынан солбуһан бастыҥ үөрэнээччилэр олоруохтаахтар. Салгыы сүбэ мунньахха Билии күнүгэр уонна ГИА балаҕан ыйдааҕы түһүмэҕэр бэлэмнэнии, үөрэх үлэһиттэрин балаҕан ыйынааҕы сүбэ мунньаҕын боппуруостара эмиэ таарылынна. Улуус дьаһалтатын пресс-сулууспата.