Ньурба улууһугар өрөспүүбүлүкэ Бырабыыталыстыбатын бэрэссэдээтэлин солбуйааччы Сергей М...
Ньурба улууһугар өрөспүүбүлүкэ Бырабыыталыстыбатын бэрэссэдээтэлин солбуйааччы Сергей Местников икки күн үлэлээтэ. Саха сирин норуоттарын IX Спортивнай оонньууларыгар тутуллар эбийиэктэри көрдө. Ол курдук, үлэтин сырыытын Чаппандаҕа уонна Антоновкаҕа тутулла турар спортивнай саалалары көрүүттэн саҕалаата. Антоновкаҕа федеральнай бырагырааманан интернаты кытта спортивнай күөн көрсүү саалата тутулла турар. Салгыы оробуочай бөлөх эһиилги Оонньуулар тутаах эбийиэктэригэр - 3 тыһыынча миэстэлээх стадиоҥҥа уонна Физкултуурунай-чэбдигирдэр комплекска сырытта. Маны сэргэ Ньурбаҕа эмтиир корпус тутуутун тиийэн билистэ. Билигин манна саҥа бэдэрээтчит - “Монтажник” ХЭТ тэтимин лаппа түргэтэтэн, тымныйыар диэри тас үлэни түмүктүүр, түннүктэри уонна сарайын сабан ититиитин холбуур былааннаахтар. Бу кэннэ Ньурбачааҥҥа стендовай ытыы былаһааккатын көрдө-иһиттэ. Манна полигон бэлэм буолуута - 90%, уоту холбооһун боппуруоһа быһаарыллар. Өссө биир эбийиэгинэн Сүлэ нэһилиэгэр модульнай спортивнай саала тутуута буолар. Бу эбийиэккэ «Колорит» ХЭТ үлэ бастакы түһүмэҕин - акылаатын оҥоро сылдьар. Бүгүн Сергей Местников СӨ норуоттарын IX Спортивнай оонньууларын тэрийэр өрөспүүбүлүкэтээҕи кэмитиэт көһө сылдьар сүбэ мунньаҕын салайан ыытта. Бу курдук Ньурба улууһугар күн бүгүн ыытылла турар үгүс хайысхаҕа үлэ хаамыытын миэстэтигэр тиийэн быһаарыста, саҥа соруктары туруорда. Улуус дьаһалтатын пресс-сулууспата.