Ньурба улууһун Чаппанда нэһилиэгэр күүтүүлээх врачебнай амбулатория арылынна.
Ньурба улууһун Чаппанда нэһилиэгэр күүтүүлээх врачебнай амбулатория арылынна. Чаппанда нэһилиэнньэтин ахсаана 500 тахса киһи, саҥа балыыһа ыаллыы сытар Дьаархан нэһилиэгин олохтоохторун эмиэ көрөр-истэр буолуоҕа. 150 кв.м. иэннээх сылаас, сырдык балыыһа дьиэтин үөрүүлээх арыллыытыгар ыаллыы улуустан, оройуонтан, Чаппанда балыыһатын бэтэрээн үлэһиттэрэ, олохтоохтор кытыннылар. Ураты долгутуулаах түгэнинэн СӨ Ил Дархана Айсен Николаев видео-сибээс нөҥүө кыттыыта буолла. Уус Алдан Бэйдиҥэтин, Дьокуускай к. Мархатын, Үөһээ Бүлүү Боотулутун, Нам улууһун Кириэс-Кытылын кытта тэҥҥэ аалай лиэнтэни улуус баһылыга Алексей Иннокентьев, Ньурбатааҕы киин балыыһа кылаабынай бырааһа Артем Ксенофонтов, Чаппанда ВА сэбиэдиссэйэ Виктория Прокопьева быстылар. Олохтоохтор үөрүүлэрэ үгүс, хас да сыл кэтэспит балыыһалара дойдубут Президенэ Владимир Путин көҕүлээбит Национальнай бырайыак «Көхтөөх, уһун үйэлэнии” программатын чэрчитинэн тутулунна. Тутуу уопсай суумата 16 мөл.солк. “Азия Кар Трейдинг” ХЭТ тутуу үлэтин от ыйыгар саҕалаабыта уонна бүгүн, алтынньы 22 күнүгэр силигин ситэрэн олоххо киллэрдэ. Үөрүүлээх тэрээһиҥҥэ Чаппанда балыыһатыгар өр сылларга үтүө суобастаахтык үлэлээбит, олохтоохтор ытыктабылларын, махталларын ылбыт кэргэннии медиктэр Иван Алексеевич Илистяров уонна Александра Михайловна Широкова ааттара иҥэрилиннэ. Киирии ааҥҥа кинилэр сырдык ааттарын үйэтитэр өйдөбүнньүк дуоска арылынна. Илистяровтар оҕолоро, сиэннэрэ Чаппанда олохтоохторугар улахан махталларын тиэртилэр итиэннэ балыыһаҕа 50.000 солк.суумалаах сэртипикээти аймахтар ааттарыттан туттардылар. Участковай балыыһаҕа 30 тахса сыл үлэлээбит бэтэрээн медиктэр Гаврильева Валентина Ивановна, Иванова Елизавета Юрьевна, Семенова Любовь Алексеевна, Терентьева Римма Николаевна үөрүүлээх тэрээһиҥҥэ күндү ыалдьыт буолан кэлбиттэр: — Илистяровтар дьиэ кэргэттэрэ Чаппандаҕа олохсуйан, 8 оҕоҕо күн сирин көрдөрөн, олохтоохтор улахан махталларын ылбыт үтүө үлэһит быраастар этилэр. Оҕолоро, сиэннэрэ кинилэри утумнаан эмиэ медиктэр, улахан династия буолаллар. Бүгүн сып-сырдык, сып-сылаас саҥа балыыһа дьиэтин көрдүбүт, усулуобуйалара да үчүгэйэ. Республикабыт салалтатыгар улахан махталбытын биллэрэбит уонна нэһилиэкпит олохтоохторун үөрүүлээх түгэнинэн эҕэрдэлиибит. Саҥа балыыһаны киирэн көрдүбүт, барыта уурбут-туппут курдук. Прокопьев Владимир Гаврильевич, «Суһал көмө” суоппара: — Чаппанда балыыһатыгар суоппарынан 27-с сылбын үлэлиибин. Массыынабыт эмиэ саҥа, 2023 сыллаахха «Доруобуйа харыстабыла” программанан ылыллан кэлбитэ, нэһилиэнньэ туһугар бэккэ сүүрэ сылдьар. Саҥа балыыһабыт үлэҕэ киирбититтэн олус үөрэн турабын. Нэһилиэнньэбит да абыраныа, турар сирэ да үчүгэй – нэһилиэк киинигэр, кыстыкка киириигэ үчүгэй бэлэх буолла. Өр сылларга дьон доруобуйата тупсарын туһугар бэриниилээхтик үлэлээбит бэтэрээн медиктэргэ, билигин үлэлии-хамсыы сылдьар үлэһиттэргэ махтал суруктары, өйдөбүнньүк бэлэхтэри улуус баһылыга Алексей Иннокентьев, депутаттар Сэбиэттэрин бэрэссэдээтэлэ Нюргуяна Михайлова, Чаппанда нэһилиэгин баһылыга Краснослав Бухолов, Киин балыыһа кылаабынай бырааһа Артем Ксенофонтов эҕэрдэлэрин, махталларын тиэрдэн туран туттардылар. Эһиил, 2027 сылга бу курдук тииптээх балыыһа аны Чуукаар нэһилиэгэр тутуллара күүтүллэр. Лена ПЕТРОВА. @gazetanyurba @ulusmedia