Бу дьыл алтынньы 28 күнүгэр Ньурба оройуонун Михаил Мегежекскэй аатынан Маалыкай орто о...
Бу дьыл алтынньы 28 күнүгэр Ньурба оройуонун Михаил Мегежекскэй аатынан Маалыкай орто оскуолатын базатыгар «Сыл бастыҥ сүбэһитэ» өрөспүүбүлүкүтээҕи күрэх муниципальнай этаба үрдүк таһымҥа ыытылынна. Биллэрин курдук, «Оҕо саас навигатордара» Бүтүн Арассыыйатааҕы бырайыак сирдиир ымыытынан саһархай өҥнөөх кумааҕы сөмөлүөт буолар. Ол иһин тэрээһин сүрүн концепциятыгар сөмөлүөт, халлааҥҥа көтүү, аэропорт тиэмэтэ сөп түбэстэ. Кэлбит ыалдьыттары «Маалыкай авиалиниялара» хампаанньа аэропордугар полиция кылааһын оҕолоро хонтуруол зонатынан аһардылар. Пассажирдары регистрациялаан, посадочнай талон туттартаатылар. Сынньалаҥ кэмигэр борт иһигэр аһааһын, араадьыйанан биллэриилэр, экраҥҥа көтүү расписаниета сирдээтилэр. Күрэх үөрүүлээх арыллыыта бортпроводницалар үҥкүүлэриттэн саҕаланна. Бииртэн биир талааннаах советник тахсан, ситиһиилээх үлэтин кистэлэҥин, сүбэһит оруолун, миссиятын визиткатыгар көрдөрдө. Оҕону иитэр үлэҕэ суолдьут оҥостор 9 саха саарыныттан талан, сүбэһиттэр оҕолорго олус үчүгэй ис хоһоонноох аһаҕас уруоктары ыыттылар. Сүбэһит идэтигэр тус көрүүтүн, иитэр үлэ сүрүн сыаннастарын киэҥник ырытан көрөр, саҥарар-иҥэрэр сатабылын көрдөрөр түһүмэҕинэн педагогическай интервью буолла. Күрэх түмүгүнэн 1 миэстэни Маалыкай орто оскуолатын советнига Кононова Виктория Васильевна, 2 миэстэни Антоновка орто оскуолатын советнига Семенова Светлана Анатольевна, 3 миэстэни Хаҥалас орто оскуолатын советнига Иванова Милена Прокопьевна ыллылар. Атын кыттаччылар бары анал номинацияларынан бэлиэтэннилэр. Ньурба оройуонун саамай көхтөөх, саамай талааннаах советниктара “Летим с заботой, действуем сердцем” диэн биир девизтээх, биир курсу тутуһан, биир туһаайыынан көттүлэр🤗✈️💜💛