«ТААТТА ДАЛЬНОБОЙ» УОН СЫЛА — 8 июня 2026 г. в 12:46:32.583
«ТААТТА ДАЛЬНОБОЙ» УОН СЫЛА 🌀Бу күннэргэ Таатта улууһун олоҕор биир бэлиэ уонна үөрүүлээх түгэн буолан ааста — «Таатта Дальнобой» уопсастыбаннай тэрилтэ төрүттэммитэ 10 сылын бэлиэтээтилэр. Улуус киинигэр Ытык Күөлгэ бу үбүлүөйгэ анаммыт тэрээһиннэр үрдүк таһымнаахтык ыытылыннылар. 🌀«Таатта Дальнобой» — бу суол иккис дьиэлэрэ буолбут, тыйыс айантан толлубат хорсун дьон түмсүүлэрэ. Уон сыл анараа өттүгэр тэриллибит уопсастыба бүгүн улуус уопсастыбаннай олоҕор биир саамай көхтөөх уонна күүстээх күүс буола улаатта. Бу кэм устата кинилэр идэлээх бырааһынньыктарын эрэ бэлиэтиир буолбакка, төрөөбүт улуустарын тупсарыыга, кэнчээри ыччаты иитиигэ улахан кылааттарын киллэрдилэр. Уопсастыба салайааччыта Никифор Кутугутов бэлиэтииринэн: «Биһиги тэриллиэхпититтэн сүрүн сыалбытынан — сомоҕолоһуу уонна тулалыыр эйгэбитин тупсарыы буолбута. Дальнобойщик диэн суолга эрэ сылдьар киһи буолбатах, кини бэйэтин дойдутун патриота, үтүө дьыала көҕүлээччитэ буолуохтаах». «Таатта Дальнобой» киллэрбит сүрүн кылааттарынан «Алгыстаах айан» искибиэр. Бу ураты суолталаах сир улуус киинигэр турар. Айанньыттар сиэрин-туомун толорон, алгыс ылан айанныылларыгар анаан оҥоһуллубут кэрэ көстүүлээх сир. Бу искибиэр билигин Таатта улууһун биир сүрүн ытык сиринэн буолла. Маны таһынан «Дьол тааһа» искибиэр ППМИ сүнньүнэн туппуттара. Бу искибиэр олохтоохтор уонна ыалдьыттар сынньаналларыгар, үөрүүлээх түгэннэрин бэлиэтииллэригэр анаан тутуллубут искибиэр. Бу эбийиэги дальнобойщиктар бэйэлэрин күүстэринэн, көмөлөһөөн туппут киэн туттуулара буолар. 🌀Уопсастыба чилиэннэрэ араас аһымал ааксыйалартан туора турбаттар. Улуус иһигэр буолар бөдөҥ тутууларга, суол-иис оҥоһуутугар, ону таһынан нэһилиэктэргэ уустук кэмнэргэ (халаан уута, баһаардар) күүс-көмө буолаллар. 🌿Үбүлүөйдээх тэрээһин кэмигэр бастыҥ суоппардарга, уопсастыба актыбыыстарыгар уонна бэтэрээннэригэр улуус дьаһалтатын, министерстволар бочуоттаах грамоталара уонна махтал суруктара туттарылыннылар. Никифор Кутугутов салалтатынан «Таатта Дальнобой» инникитин өссө элбэх былааннардаах. Кинилэр холобурдарыгар олоҕуран, атын улуустарга эмиэ маннык түмсүүлэр тэриллэн эрэллэрэ — бу Таатта суоппардарын үлэтэ үрдүк таһымнааҕын уонна суолталааҕын туоһулуур. 🌿Айан аргыстаах, суол доҕордоох буоллун! «Таатта Дальнобой» уопсастыбаҕа өссө да ситиһиилэри, чэгиэн туругу уонна саҥа үрдэллэри баҕарабыт! @taattaadm