🎖♟ ЫТЫК КЫРДЬАҔАС ЫҤЫРЫЫТЫНАН — 26 июня 2026 г. в 11:03:53.111
🎖♟ ЫТЫК КЫРДЬАҔАС ЫҤЫРЫЫТЫНАН Бүгүн 102 саастаах Аҕа дойду Улуу сэриитин бэтэрээнэ, улууспут мааны ытык киһитэ Наум Трифонович Слепцов бэйэтин истиҥ ыҥырыытынан дьиэтигэр ыалдьыттаатым. Тус бэйэм ааппыттан уонна улуус бар дьонун ааттарыттан Наум Трифоновичка ытык Тааттабыт уйгулаах Ыһыаҕар бочуоттаах ыалдьыт буолан кэлэн, түһүлгэбитин киэргэппитигэр, улахан барҕа махталы тиэртим. Ытык бэтэрээммит ыһыахха кэлэн кыттыбыта — барыбытыгар улахан өрөгөй уонна күүстээх санаа холобура буолла. Көрсүһүү кэмигэр Наум Трифонович бэйэтин инники былааннарын үллэһиннэ уонна миэхэ — улуус саахымат Федерациятын салайааччытыгар — бэртээхэй этии киллэрдэ. Быйыл Саха сиригэр саахымат хамсааһына төрүттэммитэ 100 сыллаах үбүлүөйүн бэлиэтиибит. Онон сибээстээн, улууспутугар саахымат улахан күрэхтэһиитин тэрийэн ыытыахха диэн этии киллэрдэ уонна күрэххэ бэйэтин өттүттэн анал үбүлүөйдээх бириис туруоруоҕун биллэрдэ. Ытык кырдьаҕаспыт өйө-санаата сырдыгыттан, олоххо куруук көхтөөҕүттэн уонна улууска спорт сайдарын өрүү ис сүрэҕиттэн өйүүрүттэн улаханнык киэн тутуннум. Кини көҕүлээбит кэскиллээх этиитин биһиги булгуччу олоххо киллэриэхпит. Улуус баһылыга Айаал Бурцев. @taattaadm