КУЙААР СИТИМИГЭР КИЭҤНИК ТАРҔАММЫТ САНАА СИТИМЭ... — 26 июня 2026 г. в 03:07:32.287
КУЙААР СИТИМИГЭР КИЭҤНИК ТАРҔАММЫТ САНАА СИТИМЭ... Астыммытым, сэҥээрбитим, хайҕаабытым ааҺа илик🌿🌿🌿 Ытык Таатта сирин ыҺыаҕар маҥнайгыбын сырыттым. Былырыын Манчаары оонньууларыгар улахан тэрээҺини ыыппыт дьон бэлэмнэрин сэрэйэр этим. Ол эрээри спорт тэрээҺиниттэн ыҺыах олох атын буоллаҕа. Мин анаан-минээн Ытык Таатта ыҺыаҕын алгыҺын ылынаары, хайдах ыыталларын көрөөру турунан тиийбитим. Олохтоохтор ытыктыыр алгысчыппыт Афанасий Попов алгыҺы түҺэрэр диэтилэр, сүрүн сыанаҕа олорон, кэтэстибит. Алгыс иннинэ түҺүлгэни түптэнэн, чэчиринэн, чуораанынан ыраастаатылар. Алгысчыт тыла - өҺө киҺи эрэ иҺиттэр истиэн курдук уус-уран, өйдөнүмтүө, ис сүрэҕиттэн дьонун-сэргэтин туҺугар Үрдүк Айыылартан көрдөҺөн, ыҺыах суолтатын толору өйдөтөн, үрүҥ илгэнэн ыҺыахтанан, сирин - дойдутун аҺатан, айах тутара олус ис киирбэхтик ааста. Ол кэннэ үрүҥ сылгыны сиэтэн аҕалбыттарыгар, сылгыбыт алгысчыт илиититтэн туос иҺиттэн күндүлэнэн, олус үчүгэйдик астына салбанна, киҺи эрэ сүргэтэ көтөҕүллэр турукка киллэрдэ. Дьиҥнээх айылҕа уонна сирдээҕи олох силбэҺиитэ манна көҺүннэ дии санаатым. Үгүс сирдэргэ тойон - хотун өрө тутуллан, олус өр тыл этэллэр. Манна сүрдээх дьоҺуннук, ол эрээри холкутук, боростуойдук, ытыктабыллаахтык улуус баҺылыга тыл этэрин бэлиэтээтим, онтон салгыы дьоҺун ыалдьыттар кини суолун тутустулар. Өрө күүрбэккэ, холку эҕэрдэ тылларын анаатылар, дьиҥнээх үлэ дьонугар үрдүк үтүөлэрин иҺин наҕараадалары туттардылар. Ис киирбэхтик, истиҥник ааста бу түгэн. Аҕа дойду улуу сэриитин ветерана, 102 саастаах Ытык кырдьаҕас чахчы тулуурдаах, киэҥ көҕүстээх дьон дойдутун олохтооҕун холобурун көрдөрөн толору олордо. Көрөргө астык! Киэн туттуу санаатын киллэрдэ. Бу улууска нэҺилиэктэргэ өр баҺылыктаабыт уопутурбут дьоҺун дьон элбэхтэр. Егор Владимирович Чымнаайы баҺылыга норуот хаҺаайыстыбатын үтүөлээх үлэҺитэ буолбутуттан оннооҕор мин ыалдьыт киҺи олус үөрдүм. Элбэхтэ бу дойдуга буолбут күрэхтэргэ көрбүтүм, кини тэрээҺинин, тылын-өҺүн, нэҺилиэгин хайдах тутан олорорун. Ким хантан сыдьааннааҕын, ким кийиитэ-күтүетэ, туох дьарыктаах дьон ыччаттара күрэхтэҺэ сылдьалларын толору билэр, ис иҺиттэн астынан бэлиэтиирин астына истибитим. НэҺилиэк Аҕата маннык буолуохтааҕа буолуо дии. Ытык күөл ыҺыаҕын Норуоттар Ассамблеялара кэлбиттэрэ киэргэттэ. Бу дойдуга урукку сылларга элбэх омук кэлэн олохторун остуоруйатын оҥорсон аастахтара. "От Кулаковского до Гамзатова" диэн бырайыак үлэтэ эбит. Өксөкүлээх ханнык да кэмҥэ дойдутун дьонун сайдыытын оҥоро сырыттаҕа. Аттыбар олорбут Таатталар киэн туттар киҺилэрэ, норуот маастара Изабелла Элякова олус элбэҕи кэпсээтэ. 125 сылын бэлиэтээбит Ананий Андреевтан саҕалаан, олус хараастан туран элбэх биир дойдулаахтарын репрессия сиэртибэлэрэ буолбуттарын курутуйа аҕынна. ЫҺыахтыыр сиргэ киэҥник холкутук араас күрэхтэҺиилэр, кэнсиэрдэр, атыы-тутуу ыытылла турдулар. Биир да ыксыы, ыгылла сылдьар киҺини көрбөтүм. Мантан астынан салгыы күнү көрсүүнү кэтээн көрдүм. Саламааттаах, алаадьылаах, кымыстаах чуораан тыаҺынан ыраастаан алгыс түҺүлгэтигэр киллэрдилэр. Сиэри ситэрэн, туому толорон Иван Иванов алгыҺы оҥордо. Хадаайыга күнү көрсөр сири анаан бэлэмнииллэр эбит, оруобуна күн тахсар туҺаайыытынан. ОҺуохай бүүс бүтүннүү ыччат дьонунан таҕыста. Оскуола оҕолоро, ыччаттар бу сиэри-туому билэллэрэ, барытын дьиҥнээхтии ылынан толорон иҺэллэрэ көрөргө олус үчүгэй. Мин эмиэ астык турукка киирдим. Биэс сыл саха тылын баҺылаары үөрэммит үрдүк үөрэхпэр бу ытык сиртэн суруйааччы, поэт буолбут дьон айымньыларыгар суруллубут сир-дойду ааттара, нэҺилиэстибэлэрэ, кинигэлэргэ киирбит хаартыскалар мин өйбөр билиҥҥи да кэмҥэ суолталара сүппэккэ, илэ-чахчы бу сиргэ ааспыта, мантан саҕыллан тахсыбыт айымньыларга саха норуота иитиллибиппит диэн Таатта ыҺыа5ыттан сүргэм көтөҕүллэн, айыах-тутуох баҕалаах тенуннум. Элбэ5и көрдүм, астынным, иҥэринним. Биир идэлээхтэрбин саныы саныы астынным, дириҥ силистээх-мутуктаах дойдугут аатын өрүү маннык култуура тэрээҺиннэринэн үйэтитэ, сайыннара туруҥ. Панда Саха аан дойдуга бу ыҺыаҕы