🩺🎓 Доруобуйа харыстабылыгар — саҥа кэскиллээх исписэлиистэр — 23 июня 2026 г. в 10:28:12.435
🩺🎓 Доруобуйа харыстабылыгар — саҥа кэскиллээх исписэлиистэр Бүгүн Таатта улууһугар олус үөрүүлээх уонна устуоруйаҕа киирэр бэлиэ күн буолла. Саха сирин биллиилээх бырааһа Виталий Антонович Вонгродскай аатынан Дьокуускайдааҕы медициинэ колледжын Тааттааҕы салаатын бүтэрбит 19 саҥа «Медициинэ сиэстэрэтэ» үөрүүлээх быһыыга-майгыга дипломнарын туттулар. 🌟 Ордук үөрүүлээҕэ уонна киэн тутарбыт — 8 выпускник үөрэҕин туйгуннук бүтэрэн, кыһыл диплом ылары ситистэ. Бу улахан ситиһии — улуустааҕы Киин балыыһабыт (кылаабынай быраас Сардана Владимировна Кононова), медициинэ колледжа уонна улуус дьаһалтата түһэрсибит үс өрүттээх сөбүлэҥнэрин олоххо киирбит түмүгэ буолар. Диплом ылар устудьуоннарбыт үксүлэрэ — бэйэлэрэ дьиэ кэргэннээх, элбэх оҕолоох мааны ийэлэр буолаллар. Кинилэр дьиэ кэргэн олоҕун, оҕо көрүүтүн уонна уустук медициинэ үөрэҕин ситиһиилээхтик дьүөрэлээн, үрдүк таһымнаах исписэлиистэр буолан таҕыстылар. Бу — олоххо күүстээх дьулуур уонна хорсун быһыы холобура. 📈 Оскуолаттан — медицинаҕа үлэ ситимэ 2023 сыллаахха А.И. Софронов-Алампа аатынан Ытык Күөл 1-кы нүөмэрдээх орто оскуолатыгар аһыллыбыт медицинскай кылаас үлэтин түмүгүнэн, былырыын (2025 сыллаахха) 8 үөрэнээччи медколледж устудьуона буолбута. Оскуолабыт оҕолоро үһүс сылын профессиональнай үөрэхтээһин иһинэн «младшай сиэстэрэ», "младшай медбрат" уонна «ыарыһаҕы көрүү-харайыы» анал сибидиэтэлистибэлэрин ылан тахсаллара буолар. 💬 Таатта улууһун баһылыга Айаал Бурцев эҕэрдэ тылыгар: Эһиги талбыт идэҕит — саамай аһыныгас, ытык уонна бар дьоҥҥо олус наадалаах. Эһиги сылаас илиигитигэр, сырдык дууһаҕытыгар дьон олоҕо уонна доруобуйата сүктэриллэр. Саҥа үлэҕитигэр үрдүк ситиһиилэри, ыарыһахтар истиҥ махталларын уонна дьолу баҕарабын!» Улуус баһылыга В.А. Вонгродскай аатынан медицинскай колледж дириэктэригэр Дмитрий Алексеевка Таатта улууһун сайдыытыгар үтүө кылаатын иһин бэлиэни туттарда уонна колледж салалтатыгар, Киин балыыһабыт эмчиттэригэр кэскиллээх үлэни ыыппыттарыгар барҕа махталын тиэртэ. @taattaadm