ТААТТА БООТУРА — НОРУОТ ТАПТАЛЛААХ КҮҮҺЭ — 28 июня 2026 г. в 12:57:03.466
ТААТТА БООТУРА — НОРУОТ ТАПТАЛЛААХ КҮҮҺЭ 🏆Тааттабыт талыы-талба уола, Саха сирин саамай күүстээх боотурдарын түмэр «Дыгын оонньууларыгар» уопсайа онус төгүлүн кыттан эр санаатын көрдөрбүт, үс төгүллээх үрүҥ көмүс призер Николай Матаннанов быйылгы тыҥааһыннаах күрэххэ чаҕылхай кыттыыны оҥорон, бочуоттаах төрдүс миэстэни ылла! Николайга бу үрдүк ситиһиитин иһин 300 000 солкуобайдаах бириис туттарылынна. 🔥 СААМАЙ СҮРҮН ӨРӨГӨЙ — НОРУОТ ТАПТАЛА! «Дыгын оонньууларын» кэмигэр ыытыллыбыт «Норуот тапталлаах Боотура» диэн онлайн-куоластааһыҥҥа Николай улахан арахсыылаах, ырааҕынан бастаан дьон-сэргэ истиҥ тапталын хаһаайына буолла уонна 800 000 солкуобайдаах сүдү наҕарааданан бэлиэтэннэ! Бу — бар дьонун ис сүрэхтэн махтала уонна муҥура суох өйөбүлэ буолар. 🌿Николай Матаннанов мас тардыһыытыгар уонна таас көтөҕүүтүгэр бэйэтин ураты күүһүн, дьулуурун уонна уопутун өссө төгүл итэҕэтиилээхтик көрдөрдө. Дьүүллүүр сүбэ уонна күрэхтэһиини сырдатар комментатордар кинини 16 боотур ортолоругар саамай күүстээхтэринэн билиннилэр, инникитин өссө да сыралаахтык күрэхтэһэр кыаҕа муҥура суоҕун бэлиэтээтилэр. 🎓💼 Спорт ситиһиитин таһынан, Николай Матаннанов олох араас эйгэтигэр көхтөөхтүк кыттарынан, үлэлииринэн ураты интеллигентнай, дириҥ билиилээх интеллектуал, кэрэ сэбэрэлээх уонна эргиччи сайдыылаах дьиҥнээх саха эр киһитин чаҕылхай холобурунан ааттанна. Улуу Тааттабыт аатын өрүү үрдүктүк тутар, дойдубутугар күүстээх санааны уонна сомоҕолоһууну уматар чулуу уолбутугар Николай Матаннановка Таатта улууһун баһылыгын бастакы солбуйааччы Руслан Захаров, "Таатта улууһун сайдыытыгар кылаатын иһин» 1 истиэпэннээх бэлиэни туттарда. Өссө да улахан кыайыылар үрдүктүк ситиһиллэ турдуннар! Уруй-айхал!