💧🌿 «АРАССЫЫЙА УУТА» БҮТҮН АРАССЫЫЙАТААҔЫ ЭКО-АКЦИЯ САХА СИРИГЭР ЫЫТЫЛЫННА! — 18 августа 2026 г. в 13:51:19.133
💧🌿 «АРАССЫЫЙА УУТА» БҮТҮН АРАССЫЫЙАТААҔЫ ЭКО-АКЦИЯ САХА СИРИГЭР ЫЫТЫЛЫННА! Бүгүн Саха Өрөспүүбүлүкэтигэр Бүтүн Арассыыйатааҕы «Арассыыйа уута» экологическай акция үөрүүлээхтик ыытылынна. Тэрээһин киин былаһааккатынан Дьокуускай куоракка Улуу Өлүөнэ өрүс кытыла буолла. Манна волонтердар, уопсастыбанньыктар, тэрилтэлэр бэрэстэбиитэллэрэ уонна ыччаттар кыттыылаах сүҥкэн масштабтаах экологическай субуотунньук ыытылынна. Былаһааккаҕа уопсайа 1700-тэн тахса үтүө санаалаахтар муһуннулар. Акцияны Саха Өрөспүүбүлүкэтин Ил Дархана Айсен Николаев үөрүүлээхтик аста. ☀️ Атырдьах ыйын сайыҥҥы мааны күнэ Бүтүн Арассыыйатааҕы экологическай акция кыттыылаахтарын олус истиҥник көрүстэ. Устуоруйа уонна аныгы кэм биир сиргэ дьүөрэлэһэр, кэрэ көстүүлээх Улуу Өлүөнэ өрүс кытылыгар айылҕа харыстабылыгар биир санаалаахтар муһуннулар. 🌿Бу улахан акцияҕа биһиги улууспутуттан бэрэстэбиитэллэр көхтөөхтүк кыттыыны ыллылар. Таатта дьонноро биир күүс буолан, өрүс кытылын бөҕүттэн-саҕыттан ыраастааһыҥҥа бэйэлэрин дьоһун кылааттарын киллэрдилэр уонна тулалыыр эйгэни харыстааһыҥҥа биир сомоҕо буолуу суолтатын чаҕылхайдык көрдөрдүлэр. 🌿Өрөспүүбүлүкэбит Бүтүн Арассыыйатааҕы «Арассыыйа уута» эко-бэстибээли бэйэтигэр ылынар улахан быраабы Таатта улууһун Чычымах орто оскуолатын оҕолоро былырыын ситиспиттэрин түмүгэр ылбыта! 2025 сыллаахха Чычымахха Дария Иванова салайааччылаах «Талба» хамаандата Бүтүн Арассыыйатааҕы «Общий сбор» күрэххэ абсолютнай чемпионунан буолбута. Кинилэр тапталлаах Аммабыт үрэҕин кытылын ыраастаан, 12 туонна бөҕү-саҕы хомуйан, Арассыыйа үрдүнэн бастыҥнарынан ааттаммыттара. Бу хорсун быһыы Бүтүн Арассыыйатааҕы акция Саха сиригэр кэлэригэр сүрүн төһүү күүс буолбута! Биир дойдулаахтарбыт экологическай култуураны үрдэтэр уонна төрөөбүт айылҕабытын харыстыыр сүдү үлэҕэ көхтөөхтүк кытталларынан уонна дойду таһымыгар холобур буолалларынан дириҥник киэн туттабыт! Айылҕабыт мэлдьи ыраас уонна кэрэ буоллун! 📲МАХ|