ТААТТАҔА ФИЗКУЛЬТУРА УЧУУТАЛЛАРЫН УОННА ТРЕНЕРДЭР КИЭҤ ХАБААННААХ СЕМИНАРДАРА ЫЫТЫЛЫННА
ТААТТАҔА ФИЗКУЛЬТУРА УЧУУТАЛЛАРЫН УОННА ТРЕНЕРДЭР КИЭҤ ХАБААННААХ СЕМИНАРДАРА ЫЫТЫЛЫННА 🌀Алтынньы 9 күнүгэр Ытык Күөл сэлиэнньэтин саҥа МФОСК дьиэтигэр И. Г. Федосеев аатынан Оҕо-ыччат спортивнай оскуолатын тренердэригэр уонна улуус оскуолаларын физическэй культураҕа учууталларыгар аналлаах семинар буолан ааста. Тэрээһин аһыллыытыгар Таатта улууһун баһылыга Айаал Бурцев кыттыыны ылла. Кини бэйэтин этиитигэр Таатта улууһа спортка куруук өрөспүүбүлүкэҕэ инники күөҥҥэ сылдьарын, оҕолорбут уонна ыччаттарбыт бастыҥ ситиһиилэрдээхтэрин тоһоҕолоон бэлиэтээтэ. Ону кытта кэлиҥҥи сылларга улуус үрдүнэн оҕо, ыччат чөл олоҕу тутуһарыгар анаан саҥа аныгы спорт былаһааккалара, спортивнай эбийиэктэр тутуллан үлэҕэ киирбиттэрин уонна бу хайысха салгыы күүскэ сайдыаҕын эттэ. Айаал Семенович маассабай физкультураны тэрийэр уонна улуус чиэһин көмүскүүр оҕолору иитэр-уһуйар учууталларга, тренердэргэ ис сүрэҕиттэн таһаарыылаах үлэни баҕарда. 🌀2025–2026 үөрэх сылынааҕы Таатта улууһун үөрэнээччилэрин комплекснай спартакиадатын түмүктэрин Үөрэҕирии салалтатын испэсиэлиһэ О. В. Аргунова сырдатта. Ол кэннэ, Улуустааҕы үөрэҕирии салалтатын салайааччыта Иннокентий Дягилев үөрэнээччилэр комплекснай спартакиадаларыгар бастыҥ тахсыбыт оскуолалары чиэстээтэ. Ону тэҥэ Саха Өрөспүүбүлүкэтин үөрэнээччилэрин «Спортивные якутяне» спартакиадатыгар үрдүк көрдөрүүнү ситиспит учууталларга уонна тренердэргэ өрөспүүбүлүкэ таһымнаах наҕараадалары үөрүүлээх быһыыга-майгыга туттарда. 🌀Оҕо-ыччат спортивнай оскуолатын директора Егор Ноенохов уонна учууталлар 2026–2027 саҥа үөрэх сылыгар ыытыллыахтаах комплекснай спартакиада хайысхаларын, оҕо спортун өссө сайыннарыы уонна маассабай тэрээһиннэргэ бэлэмнэнии боппуруостарын ырыттылар, көрүҥнэринэн эппиэтинэстээх дьону бигэргэттилэр. Семинар түмүгүнэн кыттааччылар саҥа соруктары ылынан, улууспут оҕо спортун таһымын өссө үрдүккэ таһаарарга, ситиһиилэри хаҥатарга биир сомоҕо буолан үлэлииргэ бэлэмнэрин биллэрдилэр. 📲МАХ|