УЛУУС БАҺЫЛЫГЫН УУРААҔЫНАН АЛТЫННЬЫ 15 КҮНЭ - ТААТТАҔА ТӨРҮТ АС КҮНҮНЭН БИЛЛЭРИЛИННЭ
УЛУУС БАҺЫЛЫГЫН УУРААҔЫНАН АЛТЫННЬЫ 15 КҮНЭ - ТААТТАҔА ТӨРҮТ АС КҮНҮНЭН БИЛЛЭРИЛИННЭ 📝 Улуус баһылыгын уурааҕынан Алтынньы 15 күнэ – Таатта улууһугар төрүт ас күнүнэн биллэрилиннэ. Хас сыл аайы бу күн төрүт аһы сөргүтүүгэ, үйэтитиигэ улуус бары эйгэлэрин: култуураны, тыа хаһаайыстыбатын, үөрэхтээһини хабан былааннаах үлэлэр, тэрээһиннэр ыытыллыахтара. Төрүт ас күнүн баттаһа Саха Өрөспүүбүлүкэтин Ил Дарханын уонна Бырабыыталыстыбатын дьыалаларын тэрийэр салалта уонна Таатта улууһун дьаһалтата бииргэ үлэлэһии сөбүлэҥэр илии баттастыбыт. Сөбүлэһии чэрчитинэн Таатта улууһугар ыалдьытымсах буолуу эйгэтигэр уонна холбоһуктаах бырайыактары олоххо киллэриигэ үлэ ыытыллыаҕа. Маны тэҥэ Тааттаҕа эрэ астанар мааны астар түҥ былыргы ньымаларын техническэй сорудахтарын оҥоруу, Таатта төрүт астарын пааспардааһын үлэлэр барыахтара. Нэһилиэктэр аайы төрүт билиини илдьэ сылдьар асчыттар, күөсчүттэр чопчуланыахтара. “Саха сирин улуустарын араас амтаннара” бырайыак уонна биһиги улууспутугар ыытыллар “Иис, Уус, ас” бэстибээл чэрчилэринэн холбоһуктаах тэрээһиннэр ыытыллыахтара. Таатта култуурунай кодун илдьэ сылдьар төрүт аспытын булууга, чинчийиигэ, бэрээдэктээһиҥҥэ уонна ыалдьытымсах буолуу үгэстэрин сөптөөхтүк туһаныыга биир ситминээх силистээх үлэ барыаҕа.