«МААРЫЙА АЛГЫСТААХ ТҮҺҮЛГЭТЭ»: БАСТЫҤ САЛАМААТЧЫТ МАРИЯ БОНДАРЕВА 75 СААҺЫН ӨРӨГӨЙДӨӨХТ...
«МААРЫЙА АЛГЫСТААХ ТҮҺҮЛГЭТЭ»: БАСТЫҤ САЛАМААТЧЫТ МАРИЯ БОНДАРЕВА 75 СААҺЫН ӨРӨГӨЙДӨӨХТҮК БЭЛИЭТЭЭТИЛЭР Саха төрүт аһын сөргүтээччи, үйэтитээччи, тарҕатааччы, аатырбыт саламаатчыт уонна үрүмэни астааччы Мария Егоровна Бондарева 75 саастаах дьоро үбүлүөйүгэр анаан, Ытык Күөл «Сарыал» култуура киинигэр «Маарыйа алгыстаах түһүлгэтэ» диэн ураты, сылаас тэрээһин буолан ааста. Күндү Далбар хотун үбүлүөйүн үөрүүтүн үллэстэ, саха амтаннаах аһын сүгүрүйээччитэ буолбут 16 мааны асчыт айар күрэскэ кытынна: 🍯 Кыттааччылар дьиэлэригэр араас эгэлгэ эбиликтээх, ураты амтаннаах үрүмэлэри бэлэмнээн аҕалан дьүүллүүр сүбэҕэ көрдөрдүлэр; 🥣 Түһүлгэҕэ, дьон хараҕын ортотугар, күөс көһүйэтин оргутан саха төрүт сүмэтин — сырдык, минньигэс саламааты астаатылар. «Сарыал» саалата саха бастыҥ аһынан туолан, арыылаах саламаат минньигэс сыта тунуйда, күөс оргуйан арыы тэбэр алгыстаах көстүүтэ мустубут дьон дууһатын угуттаата. Кэлбит ыалдьыттар төрүт аһы амсайан дуоһуйдулар, асчыттар ураты сатабылларын уонна кистэлэҥнэрин сэргээн иһиттилэр. Мария Егоровна — кыттааччылартан үгүстэрин уһуйбут, саламааты, үрүмэни астыырга сүбэлэрин биэрбит дьиҥнээх наставник, үтүө сүбэһит. Дьоро түһүлгэ хаһаайката Мария Егоровна хас биирдии кыттааччыга уонна дьүүллүүр сүбэҕэ бэйэтин илиитинэн бэлэмнээбит истиҥ бэлэхтэрин үөрүүлээхтик туттарда. Ытык-мааны Мария Егоровнаҕа чыпчаал чэгиэн туругу, уостубат күүһү-уоҕу, оҕолорун, сиэннэрин сылаас тапталларын уонна төрүт аһы үйэтитэр үтүө үлэтигэр ситиһиилэри ис сүрэхпититтэн баҕарабыт! Алгыстаах түһүлгэҥ аартыга өрүү аһаҕас буоллун! 📲МАХ|