ТААТТАБЫТ ЫТЫК КЫРДЬАҔАҺА АННА СОЛОВЬЕВАҔА ИЛ ДАРХАН "ҮЙЭ СААС" БЭЛИЭТИН ТУТТАРДЫЛАР
ТААТТАБЫТ ЫТЫК КЫРДЬАҔАҺА АННА СОЛОВЬЕВАҔА ИЛ ДАРХАН "ҮЙЭ СААС" БЭЛИЭТИН ТУТТАРДЫЛАР Бүгүн, сэтинньи 3 күнүгэр, Таатта улууһун Бочуоттаах гражданина, Тыыл уонна үлэ бэтэрээнэ, педагогическай династия баһылыгын Анна Николаевна Соловьеваны олус дьоһуннаах уонна үтүө күнүнэн — 100 саастаах сүдү үбүлүөйүнэн — улуус салалтата уонна уопсастыбаннаһа тиийэн эҕэрдэлээтилэр. Ытык кырдьаҕаска Саха Өрөспүүбүлүкэтин Ил Дархана Айсен Николаев аатыттан аналлаах «Үйэ саас» бэлиэтин уонна улуус баһылыгын эҕэрдэ суругун Таатта улууһун баһылыгын бастакы солбуйааччыта Руслан Захаров үөрүүлээх быһыыга-майгыга туттарда. Маны сэргэ эҕэрдэлэрин улуус бэтэрээннэрин бэрэссэдээтэлэ Маргарита Попова, дьахталлар сэбиэттэрин бэрэссэдээтэлэ Варвара Будикина тиэртилэр. Анна Николаевна — үйэ тухары олорбут олоҕо Саха сирин сайдыытын устуоруйатын чаҕылхай сирэйэ буолар. Аҕа дойду Улуу сэриитин уустук сылларыттан саҕалаан, үөрэҕирии, культура уонна олохтоох хаһаайыстыба сайдыытыгар 44 сыл устата сүҥкэн кылаатын киллэрбитэ. Учууталынан, совхоз кадрын инспекторынан, парткабинет сэбиэдиссэйинэн таһаарыылаахтык үлэлээбитэ. Ону тэҥэ нэһилиэк дьокутаатынан, дьахталлар уонна бэтэрээннэр сэбиэттэрин салайааччытынан уопсастыбаннай олоххо куруук инники күөҥҥэ сылдьыбыта. Уус Таатта оскуолатын бастыҥ выпускниктарыгар олохтообот анал истипиэндьийэтинэн эдэр ыччаты өйүүр үтүө үгэстээх. Ийэ быһыытынан «Ийэ албана» I, II, III истиэпэннээх мэтээллэринэн, СӨ Бэрэсидьиэнэ «Ийэҕэ үрдүк махтал» бэлиэтинэн уонна «Аҕа дойду Улуу сэриитигэр килбиэннээх үлэтин иһин» мэтээлинэн наҕараадаламмыта — кини олоҕо дьиҥнээх дакаастабыла буолар. Күндү Анна Николаевнаҕа улуус дьоно-сэргэтэ өссө төгүл кытаанах чэгиэн туругу, уостубат дууһа сылааһын, оҕолоргут, сиэннэргит, хос сиэннэргит тапталларынан угуттана, өрүү үөрэн-көтөн олороргутугар ис сүрэхпититтэн баҕарабыт! 📲МАХ|