"Кырачаан ымыылар" уһуйаан кө5үлээһининэн, Бэрдьигэстээх нэһилиэгин 7 уһуйаана түмсэн, ...
"Кырачаан ымыылар" уһуйаан кө5үлээһининэн, Бэрдьигэстээх нэһилиэгин 7 уһуйаана түмсэн, алтынньы 22 күнүгэр "Махтал! Таптал! Эрэл!" диэн бастакы төрөппүт кыһатын ыыттылар. Бу тэрээһин ыал кэскилин, оҕо иитиитин туһунан сүбэлэһэр, уопут атастаһар, билиини хаҥатар сыаллаах тэрилиннэ. Күн бастакы аҥарыгар Мэхээлэ Дьөгүөрэп аатынан сынньалаҥ киинигэр эдэр төрөппүттэргэ оҕону иитии сүрүн тосхоллоругар анаммыт сүбэ мунньах буолла. Манна өбүгэ үгэһин тарҕатааччы, Александр Григорьев-Саалтааны, "Ийэ тыл кэскилэ" өрөспүүбүлүкэтээҕи хамсааһын салайааччыта Вилюяна Никитина, өр сылларга доруобуйа харыстабылыгар үлэлээбит Екатерина Герасимова, уонна "Родничок" уһуйаан сэбиэдиссэйэ Екатерина Дьячковская бэйэлэрин баай уопуттарын үллэһиннилэр, эдэр ыалларга оҕо иитиитигэр сыаналаах сүбэлэрин биэрдилэр. Тэрээһин кэмигэр уһуйаан үлэтигэр күүс-көмө буолар көхтөөх дьиэ кэргэттэр Ил Түмэн, улуус уонна нэһилиэк баһылыгын махтал суругунан бэлиэтэннилэр. Тэрээһин иккис чааһыгар төрөппүт түмсүүлэрэ бырайыак көмүскээтилэр. Оҕо сайдыытыгар уһуйааннарга көмө буолар араас сонун этиилэри киллэрдилэр. Иитээччилэр уонна төрөппүттэр биир санааҕа киирэн, бу бырайыактар олоххо киирдэхтэринэ үтүө түмүктэр тахсыахтара, оҕо бары өттүнэн сайдалларыгар бөҕө олук буолуоҕа диэн эрэли биллэрдилэр. Бу курдук түмсүүлээх үлэ нэһилиэк оҕолорун кэскилин туһугар олус суолталааҕын өссө төгүл дакаастаата.