✅Вера Егоровна – тылын уджалысь — 8 мая 2026 г. в 17:37:42.827
✅Вера Егоровна – тылын уджалысь Матыстчö май 9-öд лун. Таво ми пасъям 81 во, кыдзи помасис Ыджыд тыш. Немдiн сиктын колис тылын сöмын öти нин уджалысь. Тайö Вера Егоровна Габова, кодi чужис Немдiнын 1932-öд вося август тöлысьын. Семьяыс налöн вöлi ыджыд, Егор Ефимович да Анастасия Семёновна бать-мамыс быдтiсны квайт челядь, но Иванлöн, Александрлöн да Владимирлöн олöмыс вöлiс дженьыд. Найö кувсисны дзоляöн на. А куим нылыслы Ен сетiс кузь нэм. Кор заводитчис Ыджыд тыш, Вера Егоровналы эз на вöв весиг öкмыс арöс. Велöдчис школаын. Зэв ёна отсасис мамыслы гортас да сылöн удж вылын фермаын, мамыс вöлiс лысьтысьысьöн, сiдзжö клубын на мыськасис, а бö-рыннас изба-читальняын. Сэсся мамыс вуджис уджавны вöвъяс дорö конюшняö, но сэтöн ёнджыкасö отсасис Ваня пиыс. Вера Егоровналöн Егор Ефимович Габов батьыс мунiс дорйыны чужан му 1942-öд вося майын. Тышкасис Ленинград дорын. Квайт тöлысь и удитiс водзсасьны вöрöгкöд. Зэв ёна доймалiс, пуля веськалiс юрас, кувсис госпитальын. Сэтчö и дзебисны. Бать кувсьöм бöрын олöм лоис нöшта на сьöкыд. Но челядь велöдчисны школаын, отсасисны мамыслы да колхозлы, вермисны пыкны став сьöкыдлунсö. Вера Егоровна чужан сиктын помалiс шöр школа. Пырис уджавны кылöдчанiнö, а сэсся сiйöс корисны секретаравны сиктса сöветö. Вера Егоровналы сöмын на 20 арöс, а уджалiс нин зэв кывкутана удж вылын. Олöм мунiс водзö. Воис кад лöсьöдны семья. Петiс верöс сайö. Степан Александрович верöсыскöд чужтiсны-быдтiсны кык нылöс да пиöс. Недыр олiсны Смолянка посёлокын, но чужан сикт бöр кыскис ас дорас. Локтiсны Немдiнö, сэсся некытчö нин эз мунны. Вера Егоровна уджалiс и сиктса садйын, и сиктсöветын, öти кадö весиг ломтiс-шонтiс сад, а сэсся пенсия вылö петтöдз уджалiс сиктса сöветын. Вера Егоровна олö Надежда Степановна ныв дорас. Кыдзи тылын уджалысьöс, Вера Егоровнаöс пасйисны уна медальöн. Сылöн эм «Ветеран труда» ним. ✍Анна Липина, библиотекаын уджалысь 📸Снимокъяс библиотекалöн чукöртöмысь