🔔Челядькöд – 42-öд во — 1 сентября 2026 г. в 12:21:47.016
🔔Челядькöд – 42-öд во Сентябр öтиöд луныд ёна виччысяна школаын велöдысьяслы и велöдчысьяслы. Пожöгдінын чужöм, öні Немдінса шöр школаын ичöт классъяс велöдысь Эльвира Матюшева тайö кыпыд лунсö таво вочаавны кутас 42-öдысь нин. Буретш та мында во сайын Сыктывкарса Коми пединститут помалöм бöрын мöдöдöм серти локтіс татчö уджавны. – Сетісны меным коймöд класс, – казьтывлö Эльвира Александровна. – И со велöдан медводдза лун, медводдза урок. Некор тайö оз вун. Вöлі, дерт, кутшöмкö полыштöм. Медводдза уроксö сэки школаясын вöлі сиöма мирлы, лöнь олöмлы. Сёрнитігöн мыйöн аддзи челядьлысь шоныд видзöдлассö, сюся кывзöмсö, полöмöй вошис. Вочасöн тöдмасим öта-мöдкöд. Тадзи колисны урок бöрся урок, лун бöрся лун, во бöрся во. Медводдза воыс вöлі зэв тöдчанаöн, öд сöмын на пырöдчис уджас. Зэв сьöлöмсяньыс, кывкутöмöн дасьтысис урокъяс кежлö, мед тыр-бура сетны челядьлы тöдöмлунъяс. Учительлöн могыс абу сöмын велöдны зонпосниöс лыддьысьны да гижсьыны, но и туйдыны олöмас вöчны медводдза воськовъяс, эрдöдны налысь енбиалунсö да отсавны сöвмöдны водзö. Та мында вонас Эльвира Александровналöн ки пыр муніс дасысь муртса унджык класс, а челядь лыдсö и артыштнысö сьöкыд. На пиысь кызвыныс бура велöдчысьяс, аслыспöлöс енбиаöсь. Тшöкыда петкöдчылісны и öні на бур тöдöмлунъясöн дзирдыштлöны олимпиадаясын, петалöны вермысьясöн либö медбуръяс лыдö. Ас кадö öти велöдчысь кытшалысь мир кузя олимпиадаын вöлі вермысьöн, сэсянь вöр-ва радейтöмысла школа помалöм бöрас велöдчис сыкöд йитчöм специальносьтö, аттьöаліс медводдза велöдысьсö олöмас колана ордым бöрйыны отсалöмысь. Челядь пиысь кодъяскö радейтöны сьывны-йöктыны, серпасавны, петкöдчыны театрын, Эльвира Александровна ышöдö найöс ветлöдлыны колана кружокö, мед сöвмöдны сямнысö, а ки-кок ёнмöдны кöсйысьясöс сюртчыны спортö. – Велöдысьлы медводз колö радейтны челядьсö, кужны сибöдчыны налöн сьöлöмöдз, öд найö быдöн аслыспöлöсöсь, сöмын сэки кутас лючки гöгöрвоны найöс, а найö сійöс, – юксис аслас сьöлöмкылöмöн ань. – Ныв-зон мед босьтісны зумыд тöдöмлунъяс – тайö, дерт, зэв тöдчана. Но ме велöда, мед найö медводз вöліны бур мортöн, шаньöн да сöмын буртор вöчны зільысьöн. Эльвира Александровнаöс вöвлöм велöдчысьясыс пыр казьтывлöны сöмын бур кывъясöн, чолöмавлöны тöдчана лунъясöн. Уна вося бур уджысь вичмöдісны сылы «Почётный работник общего образования» Россия тшупöда пас, почёт грамотаяс да аттьöалан гижöдъяс. Аньлы зэв нимкодь, мый сылöн кок туйöд муніс и ыджыдджык Александр пиыс, коді öні велöдö юркарса кызьöд номера автомеханическöй техникумын. Ичöтджыкыс, Максим, уджалö «СЛПК» акционер котырын водительöн. Семьянаныс гортас волігöн мамсö гажöдöны вит внук-внучка, мыйысь сьöлöмыс шудлунöн тырлö. 📝Галина Нестерова 📸Снимок Эльвира Матюшевалöн