Үлэбит чэрчитинэн, улуустарынан култуура десаннарын тэрийэн, нэһилиэнньэни кытта көрсүһ... — 10 июля 2026 г. в 05:43:38.956
Үлэбит чэрчитинэн, улуустарынан култуура десаннарын тэрийэн, нэһилиэнньэни кытта көрсүһүүлэри саҕалаатыбыт. Ол курдук, бэҕэһээ Мэҥэ Хаҥалас Мооругар үһүс сылын тэриллэн ыытыллар «Айар айан» бырайыак иитинэн ыытыллар биллиилээх ырыа айааччы, мэдиссиинэ билимин хандьыдаата, бөдөҥ уопсастыбанньык Виталий Андросов ырыаларынан «Алааһым арылы кустуга» кэнсиэригэр кыттыһан, биир идэлээхтэрбин кытта: Ем. Ярославскай аатынан Дьокуускайдааҕы түмэл салайааччыта Николай Бугаев, П.А. Ойуунускай аатынан Саха академическай тыйаатырын артыыһа, Саха сирин театральнай деятеллэрин Сойууһун бэрэссэдээтэлэ Айаал Аммосов, «Сахафильм» киинэ хампаанньа салайааччыта Алексей Егоров – Өркөн буолан тиийэ сырыттыбыт. Бу иннинэ айар бөлөх Амма улууһун Сатаҕайыгар, Мэҥэ Хаҥалас Тараҕайыгар кэнсиэрдээн кэлбитэ. Суола дьоно киэһээҥҥи ыам иннинэ улахан сыана артыыстарын ылбаҕай ырыаларын сэргии иһиттилэр, өссө да кэлэн сайыҥҥы биир кэрэ күннэ бэлэхтии тураарыҥ диэн алгыы хааллылар. Бу кэрэ сиргэ кэлбиччэ, Моорук литэрэтиирэ түмэлигэр 94-с хаарын санныгар уулларбыт ытык кырдьаҕас, сээркээн сэһэнньит Аполлон Михайлович Апросимовы кытта көрсөн үөрдүбүт. Кини биһиэхэ түгэх төрүттэртэн саҕалаан уран тыл ааттаахтарын туһунан сэдэх кэпсээни сэһэргээтэ. Ол кэннэ Гражданскай сэрии дьоруойа К.К. Байкалов аатынан Моорук нэһилиэгин кыраайы үөрэтэр түмэлигэр тиийэн, сэдэх экспонаттары кытта билистибит. Бу курдук, тыа дьонун култууратын, олоҕун-дьаһаҕын сиһилии билсэн, ыйытыыларыгар сүбэ-ама биэрэн, биир ситимнээх үлэни ыытар тоҕоостоох. Күндү дьоммор, нэһилиэнньэни сэргэхситэр, сомоҕолуур биир идэлээхтэрбэр айар-тутар үлэҕит үгүс үтүө түмүктэри аҕаларыгар, тус бэйэҕитигэр дьолу, ситиһиини, чэгиэн буолууну баҕарабын! Афанасий Ноев