Амгинская детская школа искусств им. А.А.Черемных
Образование · 26 февраля 2026 г.
Кыл кылыһах алыптаах дорҕооно — 26 февраля 2026 г. в 03:42:53.076
Кыл кылыһах алыптаах дорҕооно Олунньу ый 13 күнүгэр академик Леонид Васильевич Киренскэй аатынан Амма лиссиэйигэр өрөспүүбүлүкэбит үрдүнэн ыытыллар Саха тылын суругун уонна бичигин күнүгэр анаммыт Саха тылын дэкээдэтин чэрчитинэн, олунньу 10 күнүгэр лисиэй 6 Б уонна 7 Б кылаастарыгар саха тыыннаах дорҕоонун “Кыл кылыһах” бөлөҕө аһаҕас уруоктары ыыттылар. Уруоктары иилээн-саҕалаан ыыттылар Амма лисиэйин саха тылын учуутала Мария Дмитриевна Ноговицына уонна английскай тыл учуутала Людмила Романовна Оконешникова. Кинилэргэ күүс-көмө, бигэ-тирэх буола тиийдилэр “Кыл кылыһах саха тыыннаах” дорҕоонун бөлөҕө. Салайааччы Саха өрөспүүбүлүкэтин култууратын бочуоттаах уонна үтүөлээх үлэһитэ Василий Алексеевич Неустроев. Аһаҕас уруокка кэлбит оҕолор үгэс быһыытынан уруоктарын сахалыы ньиргиччи хоһоон этиититтэн саҕалаатылар, сүргэлэрин көтөхтүлэр. Онтон “Кыл кылыһах” бөлөҕүнэн туттуллар инструменнарын туһунан Василий Алексеевич билиһиннэрдэ, баян доҕуһуоллаах Саха өрөспүүбүлүкэтин култууратын туйгуна Анфиса Алексеевна Федоровалыын Клавдия Онуфриева ырыаларыттан ыллаан иһитиннэрдилэр. Владимир Новиков – Күннүк Уурастыырап “Көлүкэчээн” хоһоонун доргуччу аахтылар. Норуот матыыбыгар ырыа буолан тахсыбытын биллилэр. Онтон Үстүүн Нохсоороп матыыбыгар “Туллуктуура Маарыйа” ырыа тылларын ааҕан көрдүлэр. “Кыл кылыһах” бөлөх бу ырыалар матыыптарын тыаһаттылар, оҕолорго билиһиннэрдилэр. Оҕолор биир дойдулаахтарын ырыаларын бэйэлэрэ эт куоластарынан ыллаан көрдүлэр. Уонна уруогу Үстүүн Нохсоороп матыыбыгар Амма оһуокайынан түмүктээтибит. Кыттыбыт оҕолор, киирэн көрбүт атын кылаас оҕолоро уонна учууталлар бары астыннылар, сөхтүлэр, махтал тылларын эттилэр. Сахабыт тыла үйэлэр тухары умнуллубакка, сайда туруохтун!