«Лингва» лааҕыр этнокультурнай “Силис” сменатын түмүктүүр тэрээһинэ сахалыы тыыннаах бу... — 25 июня 2026 г. в 00:28:45.745
«Лингва» лааҕыр этнокультурнай “Силис” сменатын түмүктүүр тэрээһинэ сахалыы тыыннаах буолла. Оҕолор сезон устата норуот уус-уран айымньытын кыра жанрдарыттан саҕалаан олоҥхоҕо тиийэ үөрэппиттэр. Ол түмүгүнэн этэрээттэр лааҕыр сабыллыытын киэһэтигэр сатабылларын көрдөрдүлэр: хомуска сахалыы матыыптары таһаардылар, чабырҕахтаан чоргуйдулар, уолаттар “Урааҥхайдары” үҥкүүлээтилэр, “Биэс ынахтаах Бэйбэрикээн эмээхсини” оонньоотулар, аныгы флешмоб туруордулар. “Олоҥхо-Арт” дьарыкка оҕолор оҥорбут уруһуйдарынан быыстапкалаатылар. Ыалдьыт уол Тимофеев Дамир олоҥхолуурун иһиттилэр. Бу киэһэ Дьокуускайтан олоҥхо специалистара Ульяна Флегонтова, Елена Протодьяконова ыалдьыттаатылар. Ульяна Михайловна: «Бырайыаккыт олус үчүгэй, сахалыы эйгэни үөскэтэргит билигин олус тоҕоостоох. Норуот тылын, үгэстэрин түмпүт олоҥхо саханы саха дэтэргэ күүһүн туһанаргытын кэрэхсээтим. Маннык лааҕыр баара олоҥхону үөрэтиигэ, тыл баайын иҥэрэргэ — күүс-көмө, табыгастаах ньыма. «Олоҥхо дойдутун оҕотобун» фестивальга, олоҥхо ааҕыыларыгар кыттар буолуҥ». Елена Николаевна: «Дириҥ ис хоһоонноох үлэ ыытаргытын сэргээтибит. Сайдыыбыт төрдө – төрүт тылбыт. Олоҥхо Aан дойдуга сүдү айымньынан буолар, онон билэ сатааҥ, ааҕыҥ, үөрэтиҥ. Саха норуота уран тылынан баай». Оҕолору кытта лааҕыр туһунан кэпсэтииттэн. Абрамов Арылхан, Хатыҥ Арыы орто оскуолата: «Мин төрөппүттэрим иккиэн культураҕа сыһыаннаахтар, онон культура миэхэ эмиэ чугас. Манна төрүт культураны сэргиир буолан кэлбитим. Юрчана Юрьевна дьарыктарын сөбүлээтим. Мэҥэ Хаҥаластан кэлэ сылдьыбыт олоҥхоһут Ноорой сиэнин Аксиния Николаевна Степанова олоҥхолуурун сэргээтим. Барыта интэриэһинэй, «Мисс и Мистер» куонкуруска кыттыбытым, ведущайдыыбын. Повардар наһаа үчүгэйдик аһаталлар». Аммосова Юлия, Ноева Күнэйэ, улуустааҕы гимназия: «Лааҕыры астынныбыт. Араас тэрээһиннэргэ, күрэхтэргэ кытынныбыт. Хамаанданан квест оонньууну, дебаттары сөбүлээтибит. Вокал, үҥкүү, уруһуй куруһуоктарыгар сырыттыбыт. Олорор дьиэбитин хомунабыт, таҥаспытын суунабыт, остолобуойга дьуһуурунайдыыбыт, бэйэбитин бэйэбит көрүнэбит. Хамаҕатта нэһилиэгин билистибит. Бу лааҕырга кэлэр буолуҥ диэн ыҥырабыт». Ити курдук, лааҕыр сезона түмүктэнэн, оҕолор, үлэһиттэр махтал суруктары тутан, илгэлээх ардах аннынан, лааҕыры кустук кууһан сахалыы тыыннаах күн ааста. Подписывайтесь, чтобы не пропустить самое интересное! https://max.ru/id1435269104_gos