«Икки Геройдаах Духуобунас Академията буоллубут» — 10 августа 2026 г. в 05:00:09.213
«Икки Геройдаах Духуобунас Академията буоллубут» Суруналыыс, учуонай, Саха Өрөспүүбүлүкэтин ДухуобунаҺын академига, П.А. Ойуунускай уонна В.В. Никифоров-Күлүмнүүр аатынан СӨ судаарыстыбаннай бириэмийэтин лауреата Евдокия Избекова маннык комментарий биэрдэ: — Биһиэхэ Өрөгөй күнэ үүннэ!!! Андрей Саввич Борисов — Үлэ Геройа!!! Сарсыарда үтүө сонуну ааҕаат да Семён Данилов «Орто дойдуга мин үйэбэр икки улуу событие буолла: космоска киһи көтүүтэ уонна Ойуунускай тиллиитэ» — диэн суруйбута өйбөр көтөн түстэ. Онтон биһиэхэ билиҥҥи кэмҥэ онуоха дьүөрэ уһулуччу событие буолла!!! Иккиһэ, бука, хара дьайдаах бандераны Кыайыы буолара буолуо дуу… Бу түгэн сахаларга тоҕо ураты Өрөгөй күнэ буолуохтааҕый? Михаил Ефимович Николаев Ыйааҕынан 1996 сыллаахха норуот уһулуччу дьонун түмэр Россияҕа соҕотох Духуобунас Академията тэриллибитэ. Оччолорго академик Д.К.Сивцев-Суорун Омоллоон Социалистическай Үлэ Геройын үрдүк аатын сүгэрэ. Онтон быйыл Академиябыт тэриллибитэ 30 сылыгар Академия Президенэ Андрей Саввич Борисов Үлэ Геройа буолла. Онон икки Геройдаах Духуобунас Академията буоллубут. Андрей Саввич саха омук быһыытынан бэйэтин тирэнэр тирэҕин оҥорбут, үгүс кэскиллээх дьыаланы төрүттээн саха культуратын аан дойду таһымыгар өрө таһаарбыт үтүмэн үтүөлээх киһи буолар. Андрей Борисов Үлэ Геройа буолуута Государство өттүттэн норуот өйүн-санаатын интеллектуальнай таһымын сыаналыыр билинии дии саныыбын. Онон, биһиэхэ муҥура суох киэн туттууну үөскэтэр, бүтүн омугу үрдэтэр, санаатын бөҕөргөтөр уһулуччу көстүү. Мин, кини үгүс дьайыытыгар кынат буолан, 2003 сылтан “Культурная эволюция”, 2019 сылтан “Эл Иитэ” диэн Андрей Борисов авторскай биэриилэрин тэрийэн, оҥорон эфиргэ таһаарар киһи, кини курдук бэйэтин умнан туран норуотун уһун тыынныырга түүннэри-күнүстэри үлэлиирин өрүү сөҕө, махтайа көрөбүн. Итинник дьон уһулуччулаах олохторун, охсуһууларын холобуругар кэнэҕэски ыччаттан культура дьиҥнээх деятеллэрин, норуот күөнэ буолар дьону иитэн таһаарыахпытын наада. Манна даҕатан, мин биир санааны кыбытан этэн ааһарым тоҕоостоох. Биһиги омукка биир соччото суох “дьиэк” баар. Ол балаҕан аайы баар кыра деятеллэр уһулуччу дьоммутугар тэҥнээх киһи курдук сананан, Ойуунускай саҕаттан күн бүгүҥҥэ диэри эҥин эҥинник баайсан сиилээн, үөҕэн, үҥсэн хооһурҕаталлар. Ону киксэрэр курдук, саба саҥарар оннугар сэҥээрэр эйгэ баар. Ити биһиги омукпутун үрдэппэт, ити самныы бэлиэтэ, кэнэҕэскини сарбыйар омсолоох көстүү буолара аныаха диэри өйдөнө илик. Ону өйдөөн уонна ити омсоттон общество чэгиэн күүстэригэр тирэнэн босхолоннохпутуна эрэ омук буолуохпут. 2013 сыллаахха Чингиз Айтматов үөлээннээҕэ, Киргизия народнай поэта, советскай литература классига Омор Султанов: “Андрей Борисов, Николай Лугинов курдук сүдү дьоҥҥутун сахалар харыстааҥ”, – диэбитин саныыбын. Улахан киһи ыраахтан кыраҕытык көрөн эппит. Чахчы итинник дьон үгүс омукка суохтар ээ, кинилэр үлэлэрэ-хамнастара, өйдөрө-санаалара биһиги олохпутун ис хоһооннуур. Өрөгөйбүт үрдээтин, алгыс баһа сыаланнын! Евдокия ИЗБЕКОВА, СӨ П.А. Ойуунускай уонна В.В. Никифоров-Күлүмнүүр ааттарынан Госбириэмийэлэр Лауреата, СӨ Духуобунаһын академиятын, Общественнай палататын чилиэнэ Источник: https://ulus.media/2026/08/06/ikki-gerojdaah-duhuobunas-akademiyata-buollubut/ Подписывайтесь, чтобы не пропустить самое интересное! https://max.ru/id1435269104_gos