Арчада милли моңнар яңгырады!🪗
Арчада милли моңнар яңгырады!🪗 Бүген Арча шәһәрендә күпкырлы шәхес, Татарстанның халык артисты, виртуоз баянчы, композитор Рамил Курамшин исемендәге Х нчы баянчылар һәм гармунчылар төбәкара бәйгесе, «Уйнагыз, гармуннар!» фестивале гөрләп узды. Ерак араларны якын итеп килгән милләттәшләребез, халкыбызның милли моңнарын яңгыратучы иҗатчылар җыелды. Заманалар үзгәреш кичерә. Әмма гармунчы, баянчыларның абруе кимеми. Алар һәр бәйрәмнең, һәр чараның бизәге, мәңгелек кыйммәтләрне саклаучылар. Татар халкы элек-электән җырга, моңга бай халык. Бүген бирегә телебез, милли җырларыбыз, көйләребез, гореф-гадәтләребезне танытучылар җыелган, һәм аларның күп булуы бик куандыра. Әлбәттә, мондый иҗатчылар булганда, гармун, тальян моңнары тынмас. Бик зур рәхмәт барлык катнашучыларга һәм аларга бәя биргән мәртәбәле жюрига! Рамил Курамшин исемендәге бәйгенең районыбызда 10 нчы тапкыр узуы аның әһәмияте турында ачык сөйли. Рамил Курамшин — татар баян музыкасын үстерүдә фидакарьләрчә хезмәт иткән шәхес. Аның баян өчен язган күпсанлы әсәрләрен бүген музыка мәктәпләрендә, консерваторияләрдә уйныйлар. Үзеннән соң никадәр зур байлык калдырган шәхеснең юлын дәвам итүчеләр, иҗатын үстерүчеләр булсын иде, дигән теләктә калам. Бүгенге фестивальдә районыбыз кунакларын һәм үзебезнекеләрне зурладык. Сәхнәдә Арча, Балтач, Кукмара, Теләче, Балык Бистәсе, Биектау, Әтнә районнарыннан, шулай ук Казан, Киров шәһәрләреннән, Йошкар-Ола һәм Башкортстан Республикасыннан килгән милләттәшләребез чыгыш ясады. Мондый очрашулар милләтебезне берләштерә, аңа көч һәм рухи ныклык өсти. Арча җире һәрвакыт талантларга бай булсын!