Район башкарма комитеты каршында эшләп килүче административ комиссия бүген чираттагы ут... — 1 сентября 2026 г. в 14:20:54.759
Район башкарма комитеты каршында эшләп килүче административ комиссия бүген чираттагы утырышын уздырды. Көн тәртибендә чисталык мәсьәләсе иде. Чисталык - көнүзәк проблема, район башкарма комитеты җитәкчесе тарафыннан ул аеруча да игътибарлылык сорый. Балтачыбызның матурлыгы чисталыктан башлана, пөхтәлек булмаса, нинди генә масштаблы эшләр башкарма, аның әһәмияте югалырга мөмкин. Гомумән, Балтачыбыз үсә, матурлана, рейдларга да йөрү озагракка сузыла. Әмма ничек кенә булмасын, комиссия авыл җирлекләрендә дә булырга өлгерә. Шеңшеңәр авыл җирлегенә кергән Ор авылында тикшерү барышында алар тыкрыкта терлек бүлентекләре агызган очракка тукталалар. Авыл җирлеге хуҗа кешегә кисәтү ясаган булган инде, мине хөрмәт итмәсәң, шушы тирәдә яшәүчеләрне хөрмәт ит, дигән. Чөнки биредән кешеләр дә узып йөри. Әмма эш район башкарма комитеты каршында оешкан чисталык комиссиясенә кадәр барып җитә, нәтиҗәдә Р. Аскаров административ җаваплылыкка тартылды һәм 2000 сум күләмендә штраф түләргә мәҗбүр булды. Аскаров уңган кеше, биш сыер малы, биш үгезем генә бар, ди, хуҗалыгын гаиләсе белән бергәләп алып бара. Тик син кем генә булсаң да, әйләнә-тирәлеккә зыян китерергә, җәмәгать урыннарын пычратырга тиеш түгелсең. - Җирлек башлыгы кисәткән икән, аны тыңларга кирәк, - диде комиссия рәисе Айдар Хәйретдинов.- Җирлек башлыгы урындагы дәүләт кешесе ул. Без һәр мәсьәлә буенча аннан сорыйбыз, аннан таләп итәбез. Орның су буйларында бер өмә үткәреп алырга кирәклеге турында да әйтелде комиссиядә. Әйләнә-тирәләрендәге чисталык мәсьәләсе буенча комиссиягә чакырылган башка иптәшләргә кисәтү ясалды, тагын да кабатланса, штрафка тартылачаклар. Комиссия авылларга йөрүне дәвам итә. Балтачта да эшлисе эшләр күп әле, диде Айдар Хәйретдинов. Шуңа күрә, төзелеш материаллары аунап ятмасын, үләннәр чабылган булырга тиеш, пычрак суларны юлларга, тыкрыкларга түгәргә ярамый, үзеңнең участогыңнан тышкы якта кош-корт асрау тыела. Бу таләпләрне үтәү зыянга түгел, матурлыкка гына илтә. Тыелганнардан тыелып яшик.