Баулы районы өлкәннәре ипи пешерү серләре белән уртаклашканнар — 1 октября 2026 г. в 13:42:42.885
Баулы районы өлкәннәре ипи пешерү серләре белән уртаклашканнар Өлкәннәр көне уңаеннан, Татар Томбарлысы авыл китапханәсендә “Иң кадерле уңыш – икмәк ул” дип исемләнгән чара үткәрелгән. Кичәгә кунак итеп өлкән буын вәкилләре чакырылган. Татар Томбарлысы китапханәчесе Эльвира Әхмәтҗанова кунакларны Халыкара өлкәннәр көне белән котлаган, һәрберсенең күңеленә аерым сүз табып, олыларның тәҗрибәсенә, хезмәтенә тирән ихтирамын белдергән. Икмәкнең тарихы, аның халык тормышындагы урыны, игенчелекнең авыр, ләкин изге хезмәт икәне турында кыскача күренеш күрсәтелгән: китапханәдә әзерләнгән тематик күргәзмә, иске савыт‑саба, чүпрә савыты кебек гади, әмма бик мәгънәле экспонатлар бу чарага үзенчәлекле төсмер өстәгән. Олы яшьтәге әби‑апалар ипи пешерү серләре белән уртаклашканнар. Колмактан чүпрә ясау, ипи пешерүнең үзенчәлекле этаплары турында Венера апа Гыйләҗева җентекләп сөйләгән. Кунаклар үз авылларындагы ипи пешерү гореф‑гадәтләрен искә төшергәннәр, бер‑берсенә киңәшләр биргәннәр. Чара ахырында бүген генә табадан төшкән тәмле күмәчне кисеп, барысы бергә чәй эчкәннәр. Ипинең җылысы, чәйнең тәме, дуслар арасындагы сөйләшү – барысы бергә бу бәйрәмнең иң кадерле мизгелләре булган. Фото: Эльвира Әхмәтҗанова архивы