Сайылык – инникигэ эрэл — 15 мая 2026 г. в 08:38:59.980
Сайылык – инникигэ эрэл Санаабар бу илэ көһүннэ Сайылык, алтан от сыһыылар. 2018 сыл сэтинньи ый 6 күнүнээҕи Ил Дархан А.С. Николаев ыйааҕынан, Саха Өрөспүүбүлүкэтигэр ыам ыйын 22 күнэ - Сайылык күнүнэн биллэриллибитэ. Бу ый 15 күнүгэр И.Н. Егоров-Горнай аатынан харахтарынан мөлтөхтүк көрөр дьон библиотекатын ааҕааччылара «Сайылык – инникигэ эрэл» диэн тэрээһин чэрчитинэн, Бүлүүлүүр аартык 46-с биэрэстэтигэр олорор, дьон-сэргэ ытыктыыр, сэргиир саха ыалыгар, тыа хаһаайыстыбатын билимин хандьыдаата, саха сылгытын төрдүн үөрэппит генетик-учуонай Диана Васильевна уонна Москуба куорат М.В. Фрунзе аатынан байыаннай Академияны ситиһиилээхтик бүтэрбит инженер, астаапкаҕа олорор полковник, 40-тан тахса билим ыстатыйалардаах, «Ядернай дэлби тэбэр технологиялар кыһалҕалара» монография ааптара Анатолий Игнатьевич Чомчоевтарга ыалдьыттаан кэллибит. Саха киһитэ Ньукуолунтан саҕалаан, ийэ айылҕалыын ситимнэһэ, сайын саҥатын истэ, күүс – уох ылынаары, сайылыгар курдаттыы тартарар, бүтэйдии талаһар. Сайылыктааһын – саха быдан дьыл быыһыттан, үгүс сыл түгэҕиттэн илдьэ кэлбит, өрө тутар үтүө үгэһэ. Чомчоевтар уу сахалыы тэринэн олорор хаһаайыстыбаларын көрдүбүт, сайылыктааһын укулаатын билигин да тутуһалларын сэргии иһиттибит. Манна даҕатан эттэххэ, сорох куорат ыаллара төрөөбүт дэриэбинэлэригэр эбэтэр куорат таһыгар, даачаларыгар, сайылылыы тахсар буолбуттарын бэлиэтиэххэ наада. Бу күн Кэҥкэмэҕэ, сайын кэлиитин көрсө, ахтылҕанынан аҥылыйар кии түптэни унаарыттыбыт, баай астаах-үөллээх мааны сандалы тардан, атах тэпсэн олорон сэргэх, киэҥ кэпсэтиигэ кытынныбыт. Саха ынаҕын этиттэн-үүтүттэн, сайылыктааһынтан саҕалаан, термоядернай физика, атомнай энергетика биһиги тымныы дойдубутугар туһатын өйдөөтүбүт, элбэҕи биллибит. Үлэһит дьиэ кэргэҥҥэ, Диана Васильевна уонна Анатолий Игнатьевич Чомчоевтарга, ыҥыран ыалдьыттаппыттарыгар барҕа махталбытын биллэрэбит, дьиэ кэргэн күнүнэн ис – сүрэхпититтэн эҕэрдэлиибит! Сайыммыт сылаас, халлааммыт өрүү күннээх, олохпут чуумпу, аспыт-үөлбүт дэлэгэй буоллун, - диэн баҕа санаа бастыҥын этэбит! Пухова С.И.