Республиканская детская клиническая больница Минздрава Чувашии
Без категории · 16 июля 2026 г.
Пӗчӗк ачасене тимлӗхсӗр хӑварни часах инкек патне илсе ҫитерет. Аслӑраххи хӑйне мӗн кан... — 16 июля 2026 г. в 08:28:19.004
Пӗчӗк ачасене тимлӗхсӗр хӑварни часах инкек патне илсе ҫитерет. Аслӑраххи хӑйне мӗн канӑҫсӑрлантарнине тата ҫакӑ мӗнпе ҫыхӑннине ӑнлантарма пултарать пулсан, пӗчӗккисем чылайччен йӗрмӗшнин сӑлтавне тӳрех чухлаймастӑн. Кун пек чухне васкавлӑ пулӑшу чӗнни пӗлтерӗшлӗ. Пирӗн пултарулӑх ушкӑнӗ республикӑри ача-пӑча клиника больницинче пулса курчӗ. Телее, пӗр хушӑ мотоциклсемпе питбайксемпе инкеке лекнисем тӗлӗшпе шӑп пулнине калаҫҫӗ сыватмӑшри травматологсем. Ҫакна патшалӑх автоинспекцийӗпе, массӑллӑ информаци хатӗрӗсемпе пысӑк ӗҫ туса пынипе те ҫыхӑнтараҫҫӗ. Ҫуллахи вӑхӑтра ача-пӑча лапамӗнче выляса аманнӑ тӗслӗх йышланнӑ. Тӗслӗхрен, ярӑнчӑк ҫинчен ӳксе ал-ура хуҫнисем чылай. Паянхи куна 40 яхӑн ачана йышӑнма пултаракан уйрӑмра пушӑ вырӑн ҫук. Пӗрисем сипленсе тухнӑ ҫӗре теприсем больницӑна лекеҫҫӗ. 16-ри яш, сӑмахран, Муркаш тӑрӑхӗнчи пахчинче триммерпа утӑ ҫулнӑ вӑхӑтра урине вӑйлах суранлатнӑ. Алӑк хупӑннӑ чухне аманнисем те, машин айне пулнисем те ҫу кунӗсене уҫӑ сывлӑшра мар, сыватмӑш пӳлӗмӗсенче ирттереҫҫӗ. Чылай чухне йӗркене пӑхӑнманнипе, тимлӗхе ҫухатнипе пӑтӑрмаха лекеҫҫӗ ачасем. Ача-пӑча хирурги уйрӑмӗнче те пушӑ палатӑсем ҫук. Кунта вӗтӗр-шакӑр ҫӑтса аптранисем нумайӑн. Ӑш-чике лекнӗ ют япала сарӑлма, сывлӑш ҫулӗсене аптратма пултарать. Тухтӑрсем 3 ҫула ҫитменнисене пӑрҫа, тӗрлӗ ҫимӗҫ вӑрри пама хушмаҫҫӗ. Хӗле хатӗрленекен ашшӗ-амӑшӗн уксус евӗр хутӑшсене ача алли ҫитмен тӗлте упрамалла. Чӳречерен тухса ӳкнисем, аварие лекнисем... Ача-пӑчана сыватмӑша тӗрлӗ сӑлтав илсе ҫитерет. Медицина ӗҫченӗсем ашшӗ-амӑшне ачасене куҫран вӗҫертмелле маррине, ывӑл-хӗрне упрамаллине тепӗр хут аса илтереҫҫӗ. Источник: https://chgtrk.ru/nac/novosti/zdravoohranenie/hevelcavranash-varri-vete-tettesem-konstruktor-payesem-catsa-bolnicana-lekecce/ Алиса Александрова, Вадим Владимиров #РДКБ21 #МинздравЧувашии #ВестиЧувашии