Сүүгэлэй дасанай 225 жэлэй найр наадан! — 29 августа 2026 г. в 04:47:02.589
Сүүгэлэй дасанай 225 жэлэй найр наадан! Үбэр-Байгалай хизаарай Агын Буряадай тойрогой Сүүгэлэй дасанай байгуулагдаһаар 225 жэлэй ойн баярай хэмжээ ябуулганууд мүнөөдэр үнгэрнэ. Энэ дасан хадаа Оросой Холбоото гүрэнэй эгээл ехэ дасануудай нэгэн юм. Үндэр зиндаата олон ламанар эндэһээ урган гаранхай. Мүнөөшье саг болотор эндэ гүн ухаа, буддын шажанай һургаал, ном шэнжэлэгдэжэ, дэлгэрүүлэгдэжэ байна. Хүршэ Монголой, Хитадай, Новосибирск, Хакаси, Алтай, Эрхүү, Буряад уласай болон Үбэр-Байгалай хизаарай дасануудай шэрээтэ түрүүтэеэ ламанар найрта оролсохоёо буугаа. Сүүгэлэй дасанай жиндагууд баһал олоороо хабаадана. Тамиршад һур харбаагаар, бүхэ барилдаагаар, мори урилдаагаар, һээр шаалгаар болон шагай наадаар урилдана. Илагшадта олон тоото шангууд байгуулагданхай, хабаадагша бүхэн урмашуулагдаха гээд ламанар тэмдэглэнэ.